ԵՐԵՎԱՆ, 1 դեկտեմբերի – Sputnik. ՀՀ վարչապետ Նիկոլ Փաշինյանն իր հայտարարություններով ու քայլերով ՀՀ երկրորդ նախագահ Ռոբերտ Քոչարյանի գործով միայն օգնում է։ Այսօր լրագրողների հետ զրույցում ասաց Քոչարյանի պաշտպան Հայկ Ալումյանը` անդրադառնալով երեկ կառավարությունում կայացած հանդիպմանը։
Իրավապահ համակարգի ղեկավարների ու ներկայացուցիչների մասնակցությամբ երեկ խորհրդակցություն էր կայացել ՀՀ վարչապետ Նիկոլ Փաշինյանի գլխավորությամբ։ Փաշինյանն իր դժգոհությունն էր հայտնել նոյեմբերի 9–ի լույս 10-ի գիշերը տեղի ունեցած իրադարձությունների և ԱԺ նախագահին ծեծելու դեպքի առնչությամբ` ասելով, որ գործով մեղադրյալներից 42-ից կալանավորվել են միայն 18-ը։
«Մարդու իրավունքների եվրոպական դատարան մենք բազմաթիվ գանգատներ ունենք Քոչարյանին կալանավորելու որոշման առնչությամբ։ Ի թիվս այլ հիմնավորումների, մեր գլխավոր շեշտերից մեկն այն է, որ Հայաստանում անկախ և ազատ դատական համակարգ նման գործերում չկա»,–ասաց Ալումյանը։
Նրա խոսքով` երեկ կայացած հանդիպման և այդ հանդիպման ժամանակ արված հայտարարության փաստը նույնպես կներկայացնեն ՄԻԵԴ։
Ալումյանը նշեց, որ կեսկատակ–կեսլուրջ միշտ ասում է ` եթե ՄԻԵԴ ներկայացրած գործերը շահեն, վարձատրության մի մասը կկիսեն վարչապետի հետ, քանի որ չէին պատկերացրել, որ Փաշինյանն իրենց այդքան կարող է օգնել։
Ի դեպ, այսօր Երևանի ընդհանուր իրավասության դատարանում նախատեսված է Քոչարյանի և մյուսների գործով նիստը։
Վարչապետի գրառումը ևս մեկ ապացույց էր, որ դատախազությունը Փաշինյանի խամաճիկն է. Ալումյան