ԵՐԵՎԱՆ, 29 նոյեմբերի – Sputnik. Չպայթած ականանետային արկեր են հայտնաբերվել «Ռոմա» իտալական ֆուտբոլային թիմի մարզչական ճամբարում, հայտնում է ll Messaggero պարբերականը։
Նշվում է, որ արկերը պատահաբար հայտնաբերվել են մարզչական ավանի տարածքում հողային աշխատանքների ժամանակ։
Դեպքի վայր են ժամանել Հռոմում տեղակայված ինժեներական գնդի զինվորականները և 100 մմ տրամագծով 15 ականանետային արկ հայտնաբերել։ Ամենայն հավանականությամբ, նացիստական բանակը դրանք այստեղ է թողել 1944 թվականի աշնանը, երբ հյուսիս էր նահանջում։
Հայտնում են, որ արկերը հիանալի են պահպանվել։ Վտանգավոր գտածոն տարել են, որպեսզի անվտանգ վայրում պայթեցնեն։
Շաբաթ օրը այդ պատճառով ստիպված են եղել դադարեցնել բոլոր մարզումները, լավ է, որ մոտակա շենքերի բնակիչներին տարհանելու կարիք չի եղել։
Միևնույն ժամանակ, «Ռոման» այսօր երեկոյան «Նապոլիի» հետ շատ կարևոր հանդիպում է անցկացնում։
Հենրիխ Մխիթարյանն ընդգրկվել է իտալական Ա Սերիայի խորհրդանշական հավաքականում
Նշենք, որ Եվրոպայի Լիգայում ռումինական «Կլուժի» հետ խաղում մարզիչ Պաուլո Ֆոնսեկան Մխիթարյանին հանգիստ տվեց. ֆուտբոլիստը խաղադաշտ դուրս եկավ միայն երկրորդ խաղակեսի միջնամասում։ Այսօրվա խաղում, ըստ ամենայնի, Մխիթարյանը հանդես կգա մեկնարկային կազմում, քանի որ բավական պատասխանատու խաղ է սպասվում։ Եթե «Ռոմային» հաջողվի հաղթել, առաջնությունում նա երկրորդ տեղ դուրս կգա (ակումբը դեռ կիսում է 4-5–րդ հորիզոնականները «Յուվենտուսի» հետ)։