ԵՐԵՎԱՆ, 24 նոյեմբերի - Sputnik. ՀՀ ՊՆ ռազմական ոստիկանությունը տեղեկացնում է, որ Արցախում հրադադարի հաստատումից հետո ռազմաճակատից վերադարձած քաղաքացիներից շատերը չեն հանձնել իրենց զենք–զինամթերքը։
«Պատերազմական գործողությունների ընթացքում, ՀՀ–ում հայտարարված ռազմական դրության պայմաններում, բազմաթիվ քաղաքացիներ սահմանված կարգով ստացել են զենք-զինամթերք և մեկնել ռազմաճակատ: Եռակողմ համաձայնագրի շրջանակում հրադադարի հաստատումից հետո նրանցից շատերն արդեն վերադարձել են ռազմական գործողությունների անցկացման վայրերից, սակայն դեռևս չեն հանձնել իրենց մոտ գտնվող զենք-զինամթերքը», – գրված է հաղորդագրությունում։
ՊՆ–ն հորդորում է զորահավաքի ժամանակ կամ այլ ճանապարհներով ստացած զենք-զինամթերքը կամովին հանձնել ռազմական ոստիկանություն:
Վկայակոչելով ՀՀ քրեական օրենսգրքի 235-րդ հոդվածի 5-րդ մասը` Պն–ն տեղեկացնում է, որ ապօրինի կերպով պահվող զենք, ռազմամթերք, պայթուցիկ նյութեր կամ պայթուցիկ սարքեր կամովին հանձնած անձն ազատվում է քրեական պատասխանատվությունից։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
ԱԱԾ-ն բացահայտել է Արցախից Հայաստան անօրինական ճանապարհով զինամթերք տեղափոխելու դեպքեր
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։