ԵՐԵՎԱՆ, 24 նոյեմբերի - Sputnik. Կարմիր խաչի միջազգային կոմիտեն (ԿԽՄԿ) նախատեսում է ևս 400-500 մարդ գործուղել Լեռնային Ղարաբաղ։ ՌԲԿ–ի հետ հարցազրույցում տեղեկությունը հայտնել է կոմիտեի նախագահ Փիթեր Մաուրերը։
Նա նշել է, որ վերջին վեց շաբաթվա ընթացքում Կարմիր խաչն արմատապես փոխել է Ղարաբաղում մարդասիրական առաքելության բնույթը: Նրա խոսքով՝ երբ հակամարտությունը բռնկվեց, ԿԽՄԿ-ն հասկացավ, որ «պետք է ավելին արվի»։
Արցախի նախագահը Կարմիր խաչի ներկայացուցչի հետ քննարկել է ռազմագերիների փոխանակման հարցը
Մաուրերը տեղեկացրել է, որ պատերազմից առաջ ԿԽՄԿ առաքելության բյուջեն տարածաշրջանում կազմում էր 10 միլիոն շվեյցարական ֆրանկ (գրեթե 10,96 միլիոն ԱՄՆ դոլար), իսկ 2021 թվականին այն կլինի 45 միլիոն շվեյցարական ֆրանկի (ավելի քան 49,31 միլիոն ԱՄՆ դոլար):
«Այսինքն՝ մենք չորս անգամ կավելացնենք մեր ներկայությունը։ Օրինակ` մենք բավականին քիչ մարդիկ ունենք այնտեղ, այժմ նախատեսում ենք լրացուցիչ 400-500 աշխատակից ուղարկել տարածաշրջան։ Վերջին օրերին մենք արդեն ավելացրել ենք մեր ներկայությունը», - հայտարարել է Մաուրերը։
Կոմիտեի նախագահը նաև հավելել է, որ ԿԽՄԿ-ն գրասենյակներ ունի Երևանում, Բաքվում և Բարդայում։ Հիմա զբաղված են Ստեփանակերտ մարդկանց վերադարձով։
Ավելի վաղ Ռուսաստանի ԱԳ նախարար Սերգեյ Լավրովի հետ հանդիպման ժամանակ Մաուրերը հայտարարել էր, որ Կարմիր Խաչը մտադիր է մեծացնել համագործակցությունը Ռուսաստանի հետ Լեռնային Ղարաբաղի հարցով: Կազմակերպության նախագահը հավելել էր, որ վերջին երկու շաբաթվա ընթացքում ԿԽՄԿ-ն ավելացրել է ցուցաբերվող օգնության ծավալները, հատկապես՝ հարկադիր տեղահանվածներին ուղղված:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են