ԵՐԵՎԱՆ, 24 նոյեմբերի - Sputnik. Երևանի 4682 բազմաբնակարան շենքերից միայն որոշներն ունեն ապաստարաններ ու թաքստոցներ։ Այս մասին այսօր Երևանի ավագանու նիստում հայտարարեց Երևանի քաղաքապետի առաջին տեղակալ Հրաչյա Սարգսյանը` արձագանքելով «Իմ քայլը» խմբակցության անդամ Արման Անտոնյանի քննադատությանն այն մասին, որ Երևանի շենքերի նկուղները տարիներ շարունակ վեր են ածվել սնվելու ու փող աշխատելու վայրերի։
«Այդ ապաստարանները, չգիտես ինչու, սեփականաշնորհվեցին։ Չգիտես` ում թեթև ձեռքով ու մտքով որոշվեցին, որ դրանք այլևս մեզ պետք չեն գա,– ասաց Անտոնյանը,– Տարիներ շարունակ Երևանի քաղաքապետարանից ներկայացվում էին փաստաթղթեր, իբրև թե երևանցիների ավելի քան 90 տոկոսն ապահովված է թաքստոցներով ու ցանկացած տագնապի դեպքում երևանցիներն ապահովված են ռմբակոծությունից»։
Ավագանու անդամը հայտարարեց, որ նույն` նկարված թվերով փաստաթղթերը նաև պատերազմի ընթացքում են ներկայացվել համապատասխան պետական գերատեսչությանը։
Իշխող խմբակցության անդամը պահանջեց, որ նկարված փաստաթղթերի հեղինակ պաշտոնյաները ենթարկվեն պատասխանատվության։
Նրա խոսքով` երևանցիներն անգամ պատերազմից հետո դեռ չգիտեն, թե տագնապի դեպքում իրենց վարչական շրջանում որտեղ պետք է պատսպարվեն։
Երևանի քաղաքապետի առաջին տեղակալ Հրաչյա Սարգսյանը համաձայնեց ավագանու անդամի դիտարկմանը, որ շատ թաքստոցներ Երևանում վերածվել են առևտրի կետերի։ Բայց և վստահեցրեց, որ այդ ուղղությամբ քաղաքային իշխանությւններն աշխատանք տանում են։
«Այս ընթացքում 172 «ԿամԱզ» մակնիշի ինքնաթափով շինաղբ ենք թափել միայն այդ թաքստոցներից, և այդ թաքստոցների նախապատրաստման ու պատրաստման աշխատանքները մինչև հիմա կատարվում են»,– ասաց փոխքաղաքապետը։
«Այստեղ կոֆեն քաղցր է, չուզես էլ` պետք է խմես». կյանքը Ստեփանակերտի ապաստարանում
Սարգսյանը հայտնեց նաև, որ այս ընթացքում աշխատանքներ են տարվում նաև երևանյան դպրոցների, մանկապարտեզների տարածքում ապաստարանների նախապատրաստման ուղղությամբ։
«Այս պահի դրությամբ կարող եմ ասել, որ ունենք 3 վարչական շրջան, որտեղ այդ բոլոր խնդիրները 80- 90 տոկոսով լուծված են»,– ասաց նա։
Նա հայտարարեց, որ քաղաքային իշխանությւնն աշխատելու է այնքան ժամանակ, քանի դեռ Երևանը 100 տոկոսով պատրաստ չէ քաղպաշտպանության միջոցառումների իրականացմանը։
Խորհրդային ժառանգության ապաստարանները. որքանով են Հայաստանում պատրաստ օդային տագնապին