ԵՐԵՎԱՆ, 18 նոյեմբերի – Sputnik. ՀՀ ԶՈւ գլխավոր շտաբի նախկին պետ, գեներալ-լեյտենանտ Արտակ Դավթյանը չի կարծում, թե կգտնվի մի այնպիսի հայ, որ դրական կվերաբերվի պատերազմի դադարեցման փաստաթղթում արտացոլված դրույթներին։ 168.am-ի հետ զրույցում ասել է Դավթյանը` անդրադառնալով Հայաստանի, Ադրբեջանի և Ռուսաստանի եռակողմ հայտարարությանը։
«Միևնույն ժամանակ համարում եմ, որ կոնկրետ ստեղծված իրավիճակում դա պարտադրված որոշում էր։ Համակարծիք եմ ՀՀ ԶՈւ գլխավոր շտաբի պետ Օնիկ Գասպարյանի ուղերձում նշված մտքի հետ, որ ընտրություն է կատարվել շատ վատի և ողբերգության միջև»,–ասել է Դավթյանը։
Նա նշել է` ինչու պատերազմն ավելի շուտ չի դադարեցվել, սակայն ուշադրության է արժանի ՌԴ նախագահ Վլադիմիր Պուտինի երեկվա հայտարարությունը՝ հոկտեմբերի 19-20-ին պատերազմը դադարեցնելու հնարավորության մասով։
Հարցին, թե ո՞րն էր պատճառը, որ ազատվեց Ռազմարդյունաբերության կոմիտեի նախագահի պաշտոնից, Դավթյանը պատասխանել է, որ աշխատանքից ազատվելու դիմումը գրել է նոյեմբերի 10-ին իր որոշմամբ։ Իսկ նման որոշում կայացնելու պատճառները, քանի դեռ երկրում ռազմական դրություն է, Դավթյանը չի ուզում մեկնաբանել։
Դավթյանը հասարակությանը, անհատներին խնդրում և հորդորում է այս ծանր ժամանակաշրջանում աջակցել ԶՈւ-ին կամ գոնե չխանգարել, սպայական կազմին էլ՝ կատարել իրենց պարտականություններն ավելի լավ և պատասխանատու, քան երբևէ։
Նշենք, որ Ռուսաստանի նախագահը երեկ հայտնել էր` հոկտեմբերի 20-ին Ադրբեջանի նախագահ Իլհամ Ալիևը պատերազմը դադարեցնելու համար նախապայման էր դրել հայկական կողմի դիմաց` թույլ տալ ադրբեջանցի փախստականներին վերադառնալ Շուշի։ Փաշինյանը դեմ է եղել դրան։ Պուտինի խոսքով` իր համար անհասկանալի էր, թե ինչու էր Փաշինյանը դեմ, քանի որ խոսքը վերաբերում էր խաղաղ բնակիչներին, Շուշին մնալու էր հայկական վերահսկողության տակ, և այնտեղ լինելու էին ռուս խաղաղապահները։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Հայաստանի, Ադրբեջանի և Ռուսաստանի առաջնորդների եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960-ական զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին: