ԵՐԵՎԱՆ,16 նոյեմբերի - Sputnik. 475 մարդ ռուս խաղաղապահների ուղեկցությամբ վերադարձել են Ստեփանակերտ։ Տեղեկությունը հայտնում է Ռուսաստանի պաշտպանության նախարարությունը:
«19 ավտոբուսներից բաղկացած շարասյունով Ստեփանակերտ է վերադարձել 475 մարդ։ Շարասյունը Երևան-Ստեփանակերտ երթուղով ընթացել է ռուսական խաղաղապահ զորախմբի և ռազմական ոստիկանության պարեկների ուղեկցությամբ և հասել Ստեփանակերտի գլխավոր հրապարակ», - նշված է հաղորդագրության մեջ:
Ռուս զինվորականներն ապահովել են ավտոբուսների անվտանգ տեղաշարժը շփման գծում:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Հայաստանի, Ադրբեջանի և Ռուսաստանի առաջնորդների եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960-ական զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին: