ԵՐԵՎԱՆ, 16 նոյեմբերի – Sputnik. ՀՀ վարչապետ Նիկոլ Փաշինյանն ակնկալում է, որ ընդդիմությունը հստակ կհայտարարի` բացառում են որևէ բռնի գործունեություն, բռնության հրահրում (այդ թվում զինված) իր հետագա գործունեության ընթացքում: Փաշինյանը նման գրառում է արել Facebook–ի իր էջում` անդրադառնալով դեռ երեկ արված իր մեկ այլ գրառմանը։
ՀՀ վարչապետը երեկ Facebook–ի իր էջում գրել էր, որ դիտել է առաջնագծի զինվորների տասնյակ տեսանյութերը և ապշել տղաների խորագիտությունից։ Նա դիմել էր զինվորներին` նշելով, որ սպասում է նրանց Երևանում` վերջնականորեն լուծելու պատերի տակ վնգստացողների հարցերը։ Իր այս գրառմանը Փաշինյանն անդրադարձավ նաև այսօր կայացած ասուլիսի ժամանակ։
«Այսօր ես շատ հստակ հայտարարեցի, որ ի հեճուկս շահարկումների, բռնությունը կամ բռնության հրահրումը (առավել ևս՝ զինված) որևէ կերպ չի կարող տեղ ունենալ կառավարության գործիքակազմում: Կոչ եմ անում, խնդրում եմ, պահանջում եմ՝ մեր արած որևէ հայտարարություն, որևէ ժեստ, որևէ հրավեր այս համատեքստում չդիտարկել»,–գրել է վարչապետը։
Նրա խոսքով` եթե իր որևէ ասածից նման տպավորություն կստանան, ապա դա սխալ տպավորություն է:
Կոչ անելով ընդդիմությանը բացառել բռնության կոչերը` Փաշինյանը հույս ունի դրանով վերջնականապես փակել արդեն օրեր շարունակ ծավալվող լարվածությունը:
Հիշեցնենք` այսօր Փաշինյանն ասել էր, որ բռնության կոչ անել չի ուզեցել, ընդամենը ցանկացել է ասել, որ համաձայն է հանդիպել առաջնագծից վերադարձած զինվորների հետ, քանի որ վերջիններս նման ուղերձներ են հղել իրեն։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։ ՀՀ վարչապետ Նիկոլ Փաշինյանը Facebook–ի իր էջում գրեց, որ անձամբ իր և բոլորի համար չափազանց ծանր որոշում է կայացրել:
Փաշինյանի հայտարարությունից հետո բազմաթիվ մարդիկ շարժվեցին դեպի Հանրապետության հրապարակ, մի խումբը ներխուժեց կառավարության գլխավոր մասնաշենք ու վարչապետի աշխատասենյակ, մի մասն էլ շարժվեց դեպի Բաղրամյան պողոտա ու մտավ Ազգային ժողովի շենք։ ԱԺ նախագահ Արարատ Միրզոյանը ծեծի ենթարկվեց, նրան տեղափոխեցին հիվանդանոց։
Հայաստանյան մի շարք կուսակցություններ նոյեմբերի 11–ից հանրահավաքներ են կազմակերպում` պահանջելով ՀՀ վարչապետ Նիկոլ Փաշինյանի հրաժարականը։