ԵՐԵՎԱՆ, 16 նոյեմբերի - Sputnik. Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը մի քանի օր առաջ սրտի կաթված է ստացել, սրբազանն այժմ Երևանում է: Sputnik Արմենիայի տեղեկություններով` նա չի հոսպիտալացվել, բայց հիմա լուծվում է նրան ԱՄՆ տեղափոխելու հարցը։
ArmLur.am-ը փորձել է զրուցել Պարգև սրբազանի հետ պարզելու համար` առողջական ինչ վիճակում է նա:
«Սրբազանն ասաց, որ չի ցանկանում որևէ բան այս պահին խոսել, քանի օր առաջիկայում պատրաստվում է վիրահատության նպատակով մեկնել արտերկիր»,–գրել է կայքը։
Սրբազանն ասել է, որ այժմ այլ հարցեր կան, որոնց մասին դեռ չի ցանկանում խոսել, այժմ իր բուժման հարցերով է զբաղված։
Հիշեցնենք, որ պատերազմի օրերին սրբազանը մեկ օր անգամ չի հանգստացել։ Նա ոչ միայն ժողովրդին էր դիմում ու ոգևորում, այլև միջազգային հանրությանը հորդորում էր քայլեր ձեռնարկել արցախյան պատերազմը կանգնեցնելու ու կյանքեր փրկելու համար։