ԵՐԵՎԱՆ, 14 նոյեմբերի — Sputnik.ՀՀ կրթության, գիտության, մշակույթի և սպորտի նախարարությունը տեղեկացնում է, որ դիմել է միջազգային պատկան մարմիններին՝ պահանջելով անհապաղ կանխել մշակութային վանդալիզմը։
Նշենք, որ սոցցանցերում լուսանկարներ են շրջանառվում, որտեղ երևում է, թե ինչպես են ադրբեջանցիներն արդեն իսկ վանդալիզմի ենթարկել Շուշիի Սուրբ Ղազանչեցոց եկեղեցին` դրա պատերին սևաներկով գրառումներ անելով։
«Նախարարությունն այս օրերին մշտապես կապի մեջ է ՅՈւՆԵՍԿՕ-ի և մշակութային արժեքների պաշտպանության հարցերով զբաղվող միջազգային այլ կազմակերպությունների հետ, որոնց ուշադրությունն է հրավիրում Արցախում հայկական պատմամշակութային ժառանգության և հնագիտական վայրերի վտանգված լինելու խնդրին»,–նշված է նախարարության ֆեյսբուքյան էջում։
Միաժամանակ, նախարարությունը հայտնում է, որ Ադրբեջանի վերահսկողության տակ անցնելիք տարածքներում կան բազմաթիվ կրոնական և քաղաքակրթական կարևոր նշանակության կառույցներ, հուշարձաններ, արվեստի տարբեր նմուշներ, հնավայրեր, որոնց պահպանությունը վտանգված է։
Հաշվի առնելով նախկինում Ադրբեջանի կողմից մշակութային ժառանգություն համարվող արժեքների միտումնավոր ոչնչացման (արդեն առկա են վանդալիզմի ապացույցներ Սուրբ Ամենափրկիչ Ղազանչեցոց եկեղեցու պարագայում) միջազգային իրավունքի նորմերը, ինչպես նաև ՄԱԿ-ի և Եվրոպայի խորհրդի շրջանակներում ստանձնած պարտավորությունները խախտելու դեպքերը՝ ԿԳՄՍՆ–ն դիմել է միջազգային կառույցներին։
Հայկական պատասխան բարբարոսությանը. բելգիահայ երաժիշտը նվագում է Ղազանչեցոց կիսավեր վանքում