ԵՐԵՎԱՆ, 14 նոյեմբերի - Sputnik. ՀՀ վարչապետ Նիկոլ Փաշինյանի մոտ տեղի ունեցած խորհրդակցության ընթացքում քննարկվել են ապօրինի ձեռք բերված գույքի բռնագանձման ինստիտուտի գործարկման ուղղությամբ իրականացվող աշխատանքները: Տեղեկությունը հայտնում է վարչապետի մամուլի ծառայությունը։
«Արդեն ավելի քան երկու ամիս է Հայաստանում դե յուրե գործարկվել է ապօրինի ձեռք բերված գույքի բռնագանձման մասին օրենսդրությունը և համակարգը: Այսօրվա մեր քննարկման նպատակն է հասկանալ, թե ուր ենք հասել այս ինստիտուտի ներդրման հարցում, ինչքանով է այն պատրաստ լիարժեք աշխատանքի և այս առումով առաջիկայում ինչ անելիքներ կան»,- նշել է վարչապետը:
Գլխավոր դատախազությունում ձևավորված` ապօրինի ծագում ունեցող գույքի բռնագանձման գործերով վարչությունը աշխատանքներ է տանում վարույթում առկա քրեական գործերի ուսումնասիրության, ապացուցողական բազայի համալրման ուղղությամբ: Այս աշխատանքներն իրականացվում են շահագրգիռ գերատեսչությունների հետ համագործակցությամբ։
Փաշինյանը կարևորել է ապօրինի ձեռք բերված գույքի բռնագանձման գործընթացի արդյունավետ իրականացումը։ Նա ընդգծել է, որ այս հարցում կարևոր է համապատասխան մարմինների հետևողական համագործակցությունը։
Հիշեցնենք` «Ապօրինի ծագում ունեցող գույքի բռնագանձման մասին» օրենքի համաձայն` ապօրինի ծագում ունեցող գույքը ենթակա է բռնագանձման, եթե ներկայացված ապացույցների գնահատմամբ դատարանը հանգում է հետևության, որ այդպիսի գույքի շուկայական արժեքը հայցի ներկայացման պահին գերազանցում է հիսուն միլիոն ՀՀ դրամը: Շուկայական արժեքում հաշվարկվում են նաեւ ապօրինի ծագում ունեցող գույքի բարելավումները, եթե դրանք անհնար է առանձնացնել գույքից, անկախ այդպիսի բարելավումներ կատարելու համար օգտագործված եկամտի օրինականությունից:
Ում ապօրինի գույքն է առաջինը բռնագանձվելու. Փաշինյանն ասաց` ով պիտի մտածի այդ մասին