ԵՐԵՎԱՆ, 14 նոյեմբերի - Sputnik. Զոհվածների թվի հետ կապված անորոշություններ դեռ կան, և արդեն իսկ շահարկումներ են սկսվել այդ թվի վերաբերյալ։ ՀՀ վարչապետ Նիկոլ Փաշինյանն այսօր առողջապահության նախարար Արսեն Թորոսյանի հետ հանդիպման ժամանակ հայտնել է իր այս մտահոգությունն ու հույս հայտնել, որ զոհվածների դիերի փոխանակման ցավալի գործընթացը կարճ ժամանակում կիրականացվի, և մենք անորոշություններից դուրս կգանք։
Գործադիրի ղեկավարը նշել է, որ առողջապահության նախարարին կառավարություն հրավիրելու նպատակը կորոնավիրուսի հետ կապված ընթացիկ իրավիճակը, ինչպես նաև պատերազմում վիրավորված զինծառայողների հետ կապված խնդիրները քննարկելն է։
«Տեսնենք՝ ինչ անելիքներ, դժվարություններ, հարցեր ունենք այս փուլում, որոնք պետք է կարճ ժամանակում լուծել»,- ասել է վարչապետը՝ դիմելով նախարարին։
Անդրադառնալով պատերազմում վիրավորված զինծառայողների բուժօգնությանը՝ Արսեն Թորոսյանն ընդգծել է, որ պատերազմի հենց սկզբից նախարարությունն ու ենթակա հիմնարկները լծվել են գործին: Երկու հիմնական ուղղություններով՝ Վարդենիսում և Գորիսում, կենտրոնացվել են մեծ ռեսուրսներ՝ վիրավորներին ընդունելու, տեղում բուժօգնություն ցուցաբերելու և Հայաստանի խորքում գտնվող բուժհաստատություններ տեղափոխելու համար:
«Տարբեր ինտենսիվությամբ, ըստ մասնագիտացված պրոֆիլի, ծավալվել է մոտ 36 բժշկական հիմնարկ: Աշխատանքներում ներգրավված է եղել շտապօգնության ողջ ներուժը, ձևավորվել են հավելյալ բրիգադներ: Իրականացվել է մոտ 2 հազար բժշկական կանչ՝ տեղափոխում: Այլ հիմնարկներից ևս ներգրավվել են այնպիսի ավտոմեքենաներ, որոնք հնարավոր է եղել դարձնել ռեանիմոբիլներ: Դրանք համալրել ենք նոր անձնակազմով և կրկին ներգրավել աշխատանքներում»,- նշել է նախարարը։
Նրա տեղեկացմամբ՝ օրական շտապօգնության մոտ 80 մեքենաներ զբաղվել են միայն վիրավորների տեղափոխմամբ: Գործին շատ է օգնել նաև սանավիացիան, որի միջոցով տեղափոխվել են ծայրահեղ ծանր վիրավորները:
Նախարարը շեշտել է, որ դրա շնորհիվ տեղափոխման ժամանակը կրճատվել է երեք անգամ։
Թորոսյանը նշել է, որ պատերազմի օրերին մեր երկրի առողջապահական համակարգին օգնել են նաև սփյուռքահայ բազմաթիվ բժիշկներ: Նախարարը շնորհակալություն է հայտնել սփյուռքահայ մասնագետներին։ Նա հավելել է, որ շատերը մինչ օրս ներգրավված են բուժօգնության աշխատանքներում:
Շուշիի մերձակայքից զոհվածների մարմիններ են դուրս բերվել. Արցախի ՄԻՊ