ԵՐԵՎԱՆ, 13 նոյեմբերի – Sputnik. Ռուսաստանի նախագահի մամուլի քարտուղար Դմիտրի Պեսկովը RT հեռուստաալիքին տված հարցազրույցում ասել է` Բաքվի ակնթարթային արձագանքը թույլ տվեց, որ Ռուսաստանն ընդունի ադրբեջանական կողմի ներողությունը խոցված ուղղաթիռի համար։
«Դա իսկապես դժբախտություն է, ողբերգություն, զոհվել են մեր երկու զինվորականները։ Իհարկե, ցավ է մեր զորահրամանատարների և մեր բոլոր այն մարդկանց համար, որոնք ծառայում են զինված ուժերում, և բոլոր քաղաքացիների համար», — ասել է Պեսկովը:
Նա պարզաբանել է, որ այդ ներողությունն ընդունել են, որովհետև Ադրբեջանն անաչառ հետաքննություն անցկացնելու և մեղավորներին պատժելու պատրաստակամություն է հայտնել։
Հիշեցնենք` 2020թ․ նոյեմբերի 9-ին՝ ժամը 18․30-ի սահմաններում, Ադրբեջանի Հանրապետության զինված ուժերը հրթիռային կայանքի կիրառմամբ խոցել են ՀՀ Արարատի մարզի Երասխ գյուղում թռիչք իրականացնող ՌԴ զինված ուժերի Մի–24 տեսակի՝ ակնհայտորեն ՌԴ տարբերանշանը կրող ռազմական ուղղաթիռը։ Դրա հետևանքով սպանվել են երկու անձինք և մարմնական վնասվածք ստացել ևս մեկ անձ։
Ադրբեջանի թուրքամետ ուժերը փորձել են ձախողել Ղարաբաղի մասին համաձայնությունը
Պաշտոնական Բաքուն դեպքից անմիջապես հետո խոստովանեց, որ իրենք են Հայաստանի տարածքում խոցել ռուսական ուղղաթիռը, ներողություն խնդրեց և համապատասխան փոխհատուցում վճարելու պատրաստակամություն հայտնեց: Սակայն ՌԴ-ում Ադրբեջանի դեսպան Փոլադ Բյուլբյուլօղլին «Ռոսիա սեգոդնյա» ՄՏԳ-ում նոյեմբերի 12-ին կայացած ասուլիս ժամանակ հայտարարեց, որ Մի-24 ռուսական ուղղաթիռի խոցման պատճառների մասին վերջնական եզրակացություններ դեռ չկան:
Դեպքի առթիվ ՀՀ զինվորական կենտրոնական դատախազության զինվորական ծառայության դեմ ուղղված հատկապես կարևոր գործերի քննության նկատմամբ հսկողության բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի (Սպանություն) 2-րդ մասի 1-ին, 6-րդ, 13-րդ կետերով, 384-րդ հոդվածի (Ագրեսիվ պատերազմ) 2-րդ մասի հատկանիշներով։ Քրեական գործի նախաքննությունը հանձնարարվել է ՀՀ քննչական կոմիտեին։
ՌԴ նախագահ Վլադիմիր Պուտինն ավելի վաղ ՌԴ պաշտպանության նախարար Սերգեյ Շոյգուին հանձնարարել էր օգնություն ցուցաբերել ռուսական ուղղաթիռի անձնակազմի զոհված անդամների ընտանիքներին: