ԵՐԵՎԱՆ, 11 նոյեմբերի – Sputnik. Իտալիան կարևորում է Լեռնային Ղարաբաղում հարգանքը յուրաքանչյուր համայնքի ինքնության և տարածաշրջանի մշակութային ու կրոնական բազմակարծության նկատմամբ. դա խաղաղության հասնելու անհրաժեշտ նախադրյալ է: Այս մասին ասվում է Իտալիայի արտգործնախարարության հայտարարության մեջ, որով ողջունվում է Արցախում հրադադարի մասին եռակողմ հայտարարությունը։
Իտալիայի արտաքին քաղաքական գերատեսչությունում հույս ունեն, որ այս փաստաթղթի դրույթները նախադրյալներ կստեղծեն տարածաշրջանում երկարաժամկետ հաշտության համար:
«Մենք նաև ի գիտություն ենք ընդունում կողմերի միջև ձեռք բերված այլ պայմանավորվածությունները՝ հույս ունենալով, որ դրանք կարող են պայմաններ ստեղծել ողջ տարածաշրջանում հաստատուն կայունության և հաշտության համար»,-ասվում է նախարարության հաղորդագրության մեջ։
Ընդգծվում է նաև, որ Իտալիան, որպես ԵԱՀԿ Մինսկի խմբի անդամ, ամեն կերպ կաջակցի համանախագահներին՝ հրադադարի ռեժիմի ամրապնդման գործում: Բացի այդ, ԵՄ-ի շրջանակներում պաշտոնական Հռոմը խոստանում է ներդրում ունենալ տարածաշրջանի կայունացման և զարգացման գործում, որն իրենից ներկայացնում է կապի և էներգամատակարարման կարևոր հանգույց Եվրոպայի եւ Իտալիայի համար։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար ծանր, չափազանց ծանր որոշում է կայացրել:
Փաշինյանի հայտարարությունից հետո բազմաթիվ մարդիկ շարժվել են դեպի Հանրապետության հրապարակ, մի խումբը ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Կրակը դադարեցվում է. ինչի տակ են ստորագրել Փաշինյանը, Պուտինն ու Ալիևը
Նոյեմբերի 10-ի ժամը 13։30-ի դրությամբ` հայկական կողմից զոհվել են 1302 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Ո՞ւր է այդ...». քաղաքացիները ջարդել են դռներն ու մտել ՀՀ կառավարության շենք. տեսանյութ