ԵՐԵՎԱՆ, 8 նոյեմբերի - Sputnik. Շուշիում թեժ մարտեր են ընթանում։ Տեղեկությունը Facebook-ի իր էջում հայտնում է Արցախի Հանրապետության նախագահի օգնական Արմինե Գրիգորյանը։
«Շուշիի օպերացիան ընթանում է: Այն չի ավարտվել»,- գրել է Գրիգորյանը։
Նա նաև անդրադարձել է այն մարդկանց (ներառյալ պետական կառավարման համակարգի աշխատակիցներին), որոնք այս օրերին ակտիվորեն տարածում են ադրբեջանական ապատեղեկատվությունը։
Արցախի նախագահի օգնականն ընդգծել է՝ առանց զլանալու «գրանցում է» բոլորին, որոնց համար տեղեկատվության առաջնային աղբյուրն ադրբեջանական կայքերն են:
«Ալիևի ուղերձը այնքան իր ազգաբնակչությանը չէր ուղղված, որքան հենց մեզ՝ նպատակ ունենալով դեմորալիզացնել մեր հասարակությունը»,- ընդգծում է Գրիգորյանը։
Նշենք, որ արդեն 4-րդ օրն է՝ ադրբեջանական զինուժն ակտիվ հարձակումներ է գործում Շուշիի ուղղությամբ։ Թեժ մարտեր են ընթանում քաղաքի մերձակայքում, դեպի քաղաք տանող ճանապարհներին։ Թշնամու գերնպատակն է գրավել բերդաքաղաքը։ Հայկական զինված ուժերը հետ են մղում թշնամու բոլոր հարձակումները՝ մեծ կորուստներ պատճառելով նրանց։ Այսօր առավոտվանից Շուշիի ուղղությամբ հարձակումները շարունակվել են։
Նշենք, որ քիչ առաջ ադրբեջանական կողմը հերթական ապատեղեկատվությունը տարածեց, թե իրենք գրավել են Շուշին, նախագահ Իլհամ Ալիևն անգամ շտապեց ուղերձով շնորհավորել Շուշիի «ազատագրման» առիթով։ Այս ապատեղեկատվությունը հայկական կողմը շտապեց հերքել՝ ընդգծելով, որ Շուշիի մերձակայքում մարտերը և դիվերսիոն խմբերի ոչնչացումը շարունակվում է։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 8-ի ժամը 15։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 264 ԱԹՍ-ից, 16 ուղղաթիռից, 25 ինքնաթիռից, 784 զրահատեխնիկայից, 6 ՏՕՍ-ից, 7660 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում