ԵՐԵՎԱՆ, 8 նոյեմբերի- Sputnik. Իտալական «Ա» սերիայի 2020/21 առաջնության 7-րդ տուրում «Ռոման» մրցակցի հարկի տակ ուժերը չափեց «Ջենոայի» հետ։ Ջալառոսիների կազմում հանդիպման հերոսը դարձավ Հենրիխ Մխիթարյանը, որի տրիկը` 3 գոլը, ապահովեց գայլերի հաղթանակը 3։1 հաշվով։
Ընթացիկ մրցաշրջանում Մխիթարյանը Իտալական «Ա» սերիայում աչքի էր ընկնում հիմնականում գոլային փոխանցումներով։ Այդ ցուցանիշով նա Իտալական առաջնության լավագույններից է։ Բայց մինչև «Ջենոայի» հետ հանդիպումը Հենրիխին չէր հաջողվում դառնալ գոլի հեղինակ։ Եվրոպայի լիգայի մրցաշարում նոյեմբերի 5-ին Մխիթարյանը դարձավ «Ռոմայի» պատմության մեջ ամենաարագ գոլի հեղինակն այս մրցաշարում` խաղի առաջին րոպեին գրավելով ռումինական «Կլուժի» դարպասը։
«Ջենոայի» հետ մրցավեճի առաջին կեսի վերջին վայրկյաններին Հենրիխն անկյունային հարվածից հետո գլխով եզրափակեց իր թիմի գրոհը։ Ու չնայած «Ջենոայի» ֆուտբոլիստներին հաջողվեց խփել պատասխան գնդակը երկրորդ կեսում, դա չկարողացավ կանգնեցնել հայ ֆուտբոլիստին, որը ևս երկու անգամ ստիպեց դաշտի տերերին խաղը վերսկսել կենտրոնից։ Ֆանտաստիկ հանդիպում անցկացնելով` Մխիթարյանը հաղթանակ բերեց իր թիմին, որից հետո «Ռոման» մրցաշարային աղյուսակում բարելավեց իր դիրքը` ութերորդ տեղից տեղափոխվելով երրորդ հորիզոնական։
«Ճանաչո՞ւմ ես ինձ, ճանաչիր Արցախը». Հենրիխ Մխիթարյանը նոր գրառում է արել
Մխիթարյանի նման արդյունավետությունը շատ կարևոր է ոչ միայն «Ռոմայի», այլ նաև մեր ազգային հավաքականի համար։ Նոյեմբերի 15-ին և 18-ին Հայաստանի ընտրանին Ազգերի լիգայի մրցաշարում մրցելու է համապատասխանաբար Վրաստանի և Հյուսիսային Մակեդոնիայի հավաքականների հետ։