ԵՐԵՎԱՆ, 6 նոյեմբերի – Sputnik. Թուրքիայի TRT պետական հեռուստառադիոընկերությունն աշխատանքից ազատել է նորությունների խմբագիր Մեհմետ Քարաջային՝ «Ադրբեջանը ռմբակոծում է խաղաղ բնակչությանը» սկանդալային ենթագրի համար։ Տեղեկությունը հայտնում է թուրքական Ulusal Turk լրատվական կայքը։
Այս շաբաթ հեռուսաալիքի թղթակից Բուլենթ Ղուլչուօղլուն ուղիղ եթեր էր հեռարձակում Ադրբեջանից և ցույց էր տալիս ռմբակոծված ադրբեջանական գյուղերը։ Ռեպորտաժում, մասնավորապես, թուրք լրագրողն ասում էր, որ «Հայաստանն արգելված զինատեսակներով ռմբակոծում է խաղաղ բնակչությանը»։ Բայց ամբողջ ռեպորտաժի ընթացքում էկրանին մնացել է «Ադրբեջանը ռմբակոծում է խաղաղ բնակչությանը» ենթագիրը։ Ակնհայտ է, որ հենց ենթագրում սխալի համար էլ ստիպված է եղել վճարել նորությունների խմբագիր Մեհմետ Քարաջան։
Ռեպորտաժի հրապարակումից քիչ անց ենթագրի շուրջ սկանդալ սկսվեց։ Սոցցանցերում հայկական խմբերը սկսեցին գրառումներ տարածել` նշելով, թե «Թուրքիան վերջապես ճշմարտությունն է ասել», իսկ Ադրբեջանում և Թուրքիայում նման ենթագիրն անվանեցին «խայտառակություն»։
Գտնվեցին նաև թուրքեր, որոնք հիշեցրին, որ առաջին անգամը չէ, որ TRT-ն շփոթում է ենթագրերը․օրինակ՝ այս տարվա մայիսի 19-ին ռեպորտաժ էր եթեր գնացել «Մայիսի 19՝ Հանրապետության օրը» ենթագրով, մինչդեռ այդ օրը Թուրքիայում նշվում է որպես Աթաթուրքի հիշատակի օր, իսկ Հանրապետության օրը նշվում է հոկտեմբերի 29-ին։
Ադրբեջանի նախագահի օգնական Հիքմեթ Հաջիևը ԶԼՄ-ների համար մեկնաբանություն էր տվել, որում TRT-ի ենթագիրն անվանում էր «հայկական սադրանք»։
Մեհմետ Քարաջան ստիպված է եղել ներողություն խնդրել սկանդալային ենթագրի համար, նա գրառում էր կատարել Twitter-ում, որն ավելի ուշ դարձրել էր «պաշտպանված» և փակել։ Բայց նախկին խմբագրի գրառման էկրանի լուսանկարը պահպանվել է Independent Turkce թերթի նյութում։
Սակայն խմբագրի ներողությունից հետո էլ սկանդալային ենթագիրը շարունակել է քննարկվել ադրբեջանական և թուրքական ԶԼՄ-ներում և սոցցանցերում, և TRT-ն որոշում է կայացրել աշխատանքից ազատել մեղավոր աշխատակցին։
Սա անմիջապես արձագանքի է արժանացել ծայրահեղական աջ թուրքերի շրջանում, որոնք ողջունել են այդ որոշումը։
Twitter-ում Մեհմետ Քարաջիի հաշիվը շարունակում է փակ մնալ․նա արդեն կենսագրությունից ջնջել է «TRT-ի նորությունների խմբագիր» տողը։