ԵՐԵՎԱՆ, 6 նոյեմբերի - Sputnik. ԱՊՀ կառավարությունների ղեկավարների խորհրդի նիստին սպասվում է Հայաստանի Հանրապետության փոխվարչապետ Մհեր Գրիգորյանի մասնակցությունը։ Տեղեկությունը հայտնում է ՌԻԱ Նովոստին:
Նիստը նախատեսված է այսօր։ Կանցկացվի տեսակոնֆերանսի ռեժիմով:
Հանդիպմանը կմասնակցեն նաև Ռուսաստանի վարչապետ Միխայիլ Միշուստինը, Բելառուսի վարչապետ Ռոման Գոլովչենկոն, Ղազախստանի վարչապետ Ասկար Մամինը, Մոլդովայի վարչապետ Իոն Կիկուն:
Նիստի մասնակիցների թվում են նաև Տաջիկստանի վարչապետ Կոխիր Ռասուլզոդան, նախարարների կաբինետի փոխնախագահ, Թուրքմենստանի ԱԳ նախարար Ռաշիդ Մերեդովը, Ադրբեջանի վարչապետ Ալի Իդայաթ օղլու Ասադովը և Ուզբեկստանի վարչապետ Աբդուլա Արիպովը, որը նախագահում է ԱՊՀ-ի կառավարությունների ղեկավարների խորհուրդը:
Ավելի վաղ ԱՊՀ գործադիր կոմիտեի մամուլի ծառայությունը հայտնել էր, որ նիստի ընթացքում նախատեսվում է քննարկել հարցերի մի ամբողջ շրջանակ, այդ թվում՝ համագործակցության անդամ երկրների տնտեսական փոխգործակցությունը: Նախատեսվում է մի շարք փաստաթղթեր ստորագրել։ Մասնավորապես, ստորագրման են պատրաստ ՀՕՊ միավորված համակարգերի զարգացմանը և ԱՊՀ երկրների պաշտպանության նախարարությունների ռադիացիոն, քիմիական և կենսաբանական իրադրության գնահատմանը վերաբերող փաստաթղթերը: