ԵՐԵՎԱՆ, 6 նոյեմբերի – Sputnik. Շուրջ երկու օր չեն դադարում մարտերը Շուշիի շրջակայքում։ Այսօր և երեկ, անցնող գիշերը բավականին ինտենսիվ ու ծանր մարտեր էին Շուշիի շրջակա բնակավայրերում, տանող ճանապարհների վրա և մերձակայքում։ Այսօր կայացած ճեպազրույցի ժամանակ տեղեկությունը հայտնեց ՀՀ ՊՆ ներկայացուցիչ Արծրուն Հովհաննիսյանը։
Նրա խոսքով` եթե 1992 թվականի մայիսի 8-ը հայոց պատմության մեջ նշվում է որպես Շուշիի ազատագրման օր, ապա այս անցնող օրերը հայոց պատմության մեջ կմտնեն որպես Շուշիի պաշտպանության փայլուն օրեր։
«Հակառակորդի հետախուզադիվերսիոն, առանձին վաշտային մարտավարական խմբերի, վարձկանների ոչնչացման «գյոռբագյոռ» ռազմագործողությունը հաջողությամբ շարունակվում է։ Այսօր մեր հրետանին, մեր հետևակը, այլ ստորաբաժանումներն ուղղակի հրաշքներ են գործել», - նշեց նա՝ հավելելով, որ թշնամական զինուժից Շուշիի տանող ճանապարհին տասնյակներով դիակներ են մնացել։
Հովհաննիսյանը տեղեկացրեց, որ այս պահին էլ մարտերն ընթանում են, բայց ուժգնությունը բավականին թուլացել է։ Նա նշեց, որ այլ ճակատներում համեմատաբար թույլ մարտեր են եղել։ Արծրուն Հովհաննիսյանն ընդգծեց, որ Շուշի տանող ճանապարհներին թշնամուն լավ ջարդ են տվել քարինտակցիները։ Թշնամուն օգնության շտապող ուժերին ջախջախել են նաև մյուս բնակավայրերի բնակիչները։
«Այսօր Շուշիի հերոսական պաշտպանության օրն էր։ Շուշին մերն է, Շուշին չի ընկնելու»,- հայտարարեց Հովհաննիսյանը՝ վստահեցնելով՝ հայոց բանակը մինչև վերջ կռվելու է։
Ինչպես արդեն տեղեկացրել ենք, ԱՀ արտակարգ իրավիճակների պետական ծառայությունը հայտնել էր, որ նոյեմբերի 5-ի լույս 6-ի գիշերը խաղաղ բնակավայրերում անհանգիստ է եղել։ Ադրբեջանա-թուրքական ուժերն ամբողջ գիշեր ինտենսիվ կրակի տակ են պահել Շուշի և Ստեփանակերտ քաղաքները։
Իսկ ցերեկային ժամերին հայտնի դարձավ, որ Շուշիի շրջակայքի հրոսակախմբերի մաքրման աշխատանքները շարունակվում են։ Հայկական կողմը մեկ զոհ ու մեկ վիրավոր ուներ։
Արցախի Արտակարգ իրավիճակների պետական ծառայությունն էլ հայտնել է, որ Ստեփանակերտը հրթիռակոծվում է կասետային ռումբերով։ Հրթիռներից մեկն ընկել է բնակելի տան վրա, զոհվել են քաղաքացիական 3 անձ:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 5-ի ժամը 15։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7290 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 257 անօդաչու թռչող սարք, 16 ուղղաթիռ, 25 ինքնաթիռ, 723 զրահատեխնիկա, 6 ՏՈՍ համակարգ։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում