Գործարար Սամսոն Գրիգորյանը նշում է, որ ինչպես բոլոր պատերազմական իրավիճակում գտնվող երկրներում, մեզ մոտ էլ բիզնեսի վիճակը շատ վատ է:
«Առևտրաշրջանառությունը շատ խիստ անկում է ապրել, ընդհանուր գումարի խնդիր կա երկրում, կարելի է ասել վաճառքը կանգնած է, բայց, իհարկե, հիմա ոչ ոք դրա մասին չի մտածում, բոլորի ուշադրությունը միայն առաջնագիծն է»,-նշում է Գրիգորյանը:
Գործարարը նկատում է, որ տնտեսությունն այս պահին քիչ թե շատ նորմալ վիճակում է միայն այն ծախսերի և առևտրի շնորհիվ, որ ժողովուրդը անում է առաջնագիծ ուղարկելու համար:
«Դրա շնորհիվ է, որ տնտեսությունը կոլապսի չի ենթարկվում, հուսանք, որ այս ամենը շուտ կավարտվի և այսքանով կկագնենք, չի խորանա իրավիճակը, և տնտեսական ճգնաժամի չենք հասնի»,-ասում է Գրիգորյանը:
Գործարարը նշում է, որ պատերազմն ազդել է նաև ներմուծման վրա: Քանի որ առևտրաշրջանառություն չկա, պակասել է նաև դրսից ապրանքների ներկրումը:
«Կարող եմ իմ օրինակով ասել՝ առևտրաշրջանառությունը մոտ տասը անգամ անկում է ապրել, այդ իսկ պատճառով էլ ես ներմուծելու բան չունեմ, պետք է սպասեմ մինչև մայր գումար հավաքվի և կարողանամ ապրանք ներմուծել»,-ասում է գործարարը:
Ի՞նչ հետևանք կունենա թուրքական ապրանքների ներկրման արգելքը ՀՀ տնտեսության վրա
Սամսոն Գրիգորյանը ողջունում է ՊԵԿ-ի հայտարարությունն այն մասին, որ բանակին ու պետությանը նվիրաբերելու դեպքում ներկրված ապրանքերից մաքսատուրք չի գանձվելու:
Հիշեցնենք, որ ՀՀ ԱԺ կողմից 2020թ. հոկտեմբերի 21-ին ընդունվել է «Ռազմական դրության ժամանակահատվածում հարկային արտոնություններ սահմանելու մասին» ՀՀ օրենքը, որով սահմանվել են հարկային արտոնություններ: Դրանք վերաբերում են ռազմական դրության ժամանակահատվածում ՀՀ պաշտպանության, արտակարգ իրավիճակների, տարածքային կառավարման և ենթակառուցվածքների, բարձր տեխնոլոգիական արդյունաբերության և առողջապահության նախարարություններին ապրանքների անհատույց՝ նվիրատվությամբ մատակարարումներին:
Ըստ Գրիգորյանի՝ նման քայլով պետությունը աջակցում է նրանց, ովքեր փորձում են օգնել ՊՆ-ին, պետությանը և առաջնագծին. գործարարները կարող են ապրանք բերել և սահմանի վրա նվիրաբերել պետական կարիքների համար՝ անհրաժեշտ գերատեսչությանը, իսկ այն մարդիկ, ովքեր ցանկանում են իրենց ներմուծած ապրանքը կոնկրետ տեղ տանել, ապա այս դեպքում պարտավոր են արդեն մաքսազերծել և կատարել բոլոր վճարումները:
«Սա ողջունելի է, քանի որ կլինեն մարդիկ, ովքեր նվիրաբերության անվան տակ կփորձեն զեղծարարություն անել և ներկրված ապրանքը վաճառել»,-բացատրում է Գրիգորյանը:
Ոչ մի գնաճ չի լինի. նախարարն ասել է` ինչպես կլրացվի թուրքական ապրանքների բացը
Գործարարը նշում է, որ պատերազմից հետո որոշ ոլորտներում փոքր ու միջին ձեռնարկություններում հավանաբար փոփոխություններ կլինեն. Թուրքիայից ներմուծվող ապրանքների վրա արգելանք դնելու հետո, օրինակ լավ կլինի, որ թուրքական ապրանք ներմուծողները վերապրոֆիլավորվեն և սկսեն այստեղ արտադրել հագուստ: Մնացած ապրանքների առումով ժամանակը ցույց կտա, թե էլ ինչի կարիքը կզգացվի։