ԵՐԵՎԱՆ, 5 նոյեմբերի - Sputnik. Արցախի դեմ սանձազերծված պատերազմի հետևանքով տարածաշրջանում ստեղծված իրավիճակն անհանգստացնում է Իրանին։ Այս մասին այսօր ՀՀ Ազգային ժողովի տարածաշրջանային ու եվրասիական ինտեգրման հարցերի և ֆինանսավարկային ու բյուջետային հանձնաժողովների համատեղ նիստում ասաց ՀՀ ԱԳ փոխնախարար Շավարշ Քոչարյանը։
Իրանը ոչ միայն իր անհանգստությունը բացահայտ արտահայտում է, այլև կոնկրետ անվտանգության միջոցներ է ձեռնարկում, հավելեց նա։
«Իրենք այդ ահաբեկիչների հետ կռվում էին Մերձավոր Արևելքում։ Հիմա նրանք հայտնվել են իրենց սահմանների մոտ»,– ասաց Քոչարյանը։
Նրա խոքով, վտանգն ակնհայտորեն զգում է նաև Ռուսաստանը, որովհետև վտանգն արդեն մոտեցել է Հյուսիսային Կովկասին, ամբողջ ԱՊՀ տարածքին ու անգամ Կենտրոնական Ասիային։
«Այնպես որ ձևավորվել է այնպիսի իրավիճակ, որը մտահոգում է բոլոր պետություններին, որոնց հետ մենք ունենք այս կամ այն աստիճանի խորացված հարաբերություններ»,– ասաց փոխնախարարը։
Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին 1 ամիս մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Նշենք, որ հայկական կողմին արդեն հաջողվել է գերեվարել 2 սիրիացի վարձկան–ահաբեկչի։ Նրանցից առաջինին` Մեհրեդ Մուհամմադ Ալշխերին, բռնել են հոկտեմբերի 30–ին, իսկ երկրորդին` Յուսեֆ Էլ Աբեդ Էլ Հաջիին, հայ զինծառայողները գերեվարել են նոյեմբերի 1–ին։ Նրանք արդեն ցուցմունք են տվել և պատմել իրենց հավաքագրելու պայմանների մասին։