ԵՐԵՎԱՆ, 5 նոյեմբերի – Sputnik. Դանիայի իշխանությունները որոշել են վերացնել բոլոր ջրաքիսներին, որոնք կարող են մուտացիայի ենթարկված կորոնավիրուսի կրող լինել և փոխանցել այն մարդուն։ Այս մասին, ՌԻԱ Նովոստիի փոխանցմամբ, հայտնել է Դանիայի վարչապետ Մեթե Ֆրեդերիքսենը։
Դանիական ԶԼՄ–ները նշում են, որ այս պահին մուտացիայի ենթարկված վիրուսով, որը թուլացնում է հակամարմինների ձևավորման ունակությունը, 12 մարդ է վարակվել։ Մուտացիայի ենթարկված վիրուսը կարող է խնդիր դառնալ կորոնավիրուսի դեմ պատվաստանյութի օգտագործման ժամանակ։ Այդպիսով, ջրաքիսները, որոնց մոտ մուտացիայի ենթարկված վիրուս է հայտնաբերվել, կարող են սպառնալիք հանդիսանալ նոր վարակի տարածման դեմ պայքարում։
«Դանիայում բոլոր ջրաքիսները պետք է ոչնչացվեն։ Դուք կորցնում եք ամբողջ կյանքի գործը, որը փոխանցվել է սերնդեսերունդ։ Սա սև օր է ինձ և բոլոր նրանց համար, ովքեր աշխատում են այս արդյունաբերության մեջ։ Կառավարությունը դա հասկանում է», – ասել է Ֆրեդերիքսենը։
Սա զուտ հայաստանյան երևույթ չէ. կորոնավիրուսի երկրորդ ալիքն ահագնանում է ողջ աշխարհում
Ըստ նրա` կորոնավիրուսային վարակ է հայտնաբերվել 207 ֆերմաներում, 67-ում արդեն կորցրել են իրենց կենդանիներին, 23-ում իրավիճակն անորոշ է։ Վարչապետը նշել է, որ իշխանությունները փորձել են խնդրի այլ լուծում գտնել, սակայն մուտացիայի ենթարկված վարակի տարածման վտանգը շատ մեծ է։ Դանիայի իշխանությունները կարծում են, որ վարակը կարող է տարածվել ոչ միայն Դանիայում, այլև մյուս երկրներում։
Ջրաքիսների ոչնչացման գործում ֆերմերներին կաջակցեն զինված ուժերն ու Դանիայի արտակարգ իրավիճակների գործակալությունը։ «Մենք Դանիայում գիտակցում ենք պատասխանատվությունը երկրի բնակիչների հանդեպ։ Սակայն վիրուսի մուտացիայի պայմաններում մենք նաև հասկանում ենք, թե ինչ պատասխանատվություն ենք կրում մնացած աշխարհի նկատմամբ», – հավելել է Ֆրեդերիքսենը։
Գիտնականները կորոնավիրուսի նոր բռնկում են կանխատեսել
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում: