ԵՐԵՎԱՆ, 5 նոյեմբերի – Sputnik. Ամերիկյան Garmin տեխնոլոգիական ընկերությունը ուսումնասիրություններ է սկսել պարզելու համար, թե ինչպես է իր արտադրանքը հայտնվել թուրքական «Բայրաքթար» անօդաչու թռչող սարքերում։ Այս մասին գրել է ընկերությունը՝ Ամերիկայի Հայ դատի հանձնախմբին ուղղված նամակում:
«Garmin-ին տեղեկացրել են, որ մեր արտադրանքներից մեկը կիրառվել է «Բայրաքթար» անօդաչու թռչող սարքերի մեջ, որոնք օգտագործվում են Հայաստանում և Լեռնային Ղարաբաղում անմեղ քաղաքացիական անձանց սպանելու համար: Մենք խստորեն դատապարտում ենք այս բռնությունը և կարեկցում ենք զոհերի հարազատներին»,-գրված է ընկերության պատասխան նամակում:
Նշվում է, որ ԱԹՍ-երի մեջ օգտագործվող Garmin-ի արտադրանքը կոմերցիոն, ոչ ռազմական նշանակության է և լայնորեն հասանելի է գնման համար:
Այն նախագծված չէ ռազմական օգտագործման կամ անօդաչու թռչող սարքերում կիրառելու համար:
«Հետաքննությունից հետո համապատասխան գործողություններ կձեռնարկենք՝ կանխելու համար մեր արտադրանքի այս եղանակով հետագա օգտագործումը»,-խոստացել է ընկերությունը:
Ավելի վաղ Ամերիկայի Հայ դատի հանձնախումբը տարածել էր ապացույցներ, որոնք հաստատում են, որ Թուրքիայի «Բայրաքթար» անօդաչու թռչող սարքերում օգտագործվում են ամերիկյան ընկերությունների արտադրած մասեր կամ տեխնոլոգիաներ:
Հայ դատի հանձնախումբը շարունակում է թիրախավորել այն ընկերություններին, որոնք վաճառում են անօդաչու թռչող սարքերի մասեր, և որոնք օգտագործվել են Թուրքիայի և Ադրբեջանի կողմից հայերին վնասելու համար։
«Բայրաքթարները» ՀՀ սահմանի մոտ ամեն օր հետախուզական թռիչքներ են անում. ի՞նչն են դիտարկում
Հանձնախումբը Կոնգրեսին կոչ է անում կիրառել զենքի արտահանման վերահսկման մասին օրենքները, իսկ ընկերություններին՝ դադարեցնել ցանկացած վաճառք կամ փոխանցում, որը կարող է կիրառվել խաղաղ բնակչության դեմ:
Նշենք, որ ավելի վաղ ավստրիական և կանադական ընկերություններն էին հայտարարել թուրքական «Բայրաքթարին» մասեր մատակարարելու դադարեցման մասին։