ԵՐԵՎԱՆ, 4 նոյեմբերի — Sputnik. Կառավարությունում բոլոր հնարավոր իրավական պրոցեսները քննարկվում են Հայաստանի կողմից գերեվարված սիրիացի ահաբեկիչների առնչությամբ։ Ազգային ժողովում լրագրողների հետ ճեպազրույցում ասաց ՀՀ արդարադատության նախարար Ռուստամ Բադասյանը՝ պատասխանելով լրագրողների հարցին, թե ահաբեկիչներին կալանավորելուց հետո ի՞նչ քայլեր պետք է արվեն։
«Բազմաթիվ կոնվենցիաներով որոշակի ընթացակարգեր են սահմանված` պետությունները, որոնք ներգրավված կլինեն ահաբեկչության ֆինանսավորմանը, ունեն պարտականություններ Ֆինանսական միջոցառումների աշխատանքային խմբի (ՖԱԹՖ) շրջանակներում։ Խոսքը վերաբերում է հաշիվների սառեցմանը, ֆինանսական հետաքննությանը»,–ասաց նախարարը։
Բադասյանը նշեց` եթե հանկարծ պարզվի, իսկ Ադրբեջանի դեպքում արդեն իսկ պարզվել է, որ, ունենալով ահաբեկիչներ դեմ պայքարելու պարտականություններ, դեռ մի բան էլ պետությունն ինքն է ֆինանսավորել ահաբեկչությունը և տեղափոխել հակամարտության գոտի, ապա դա բավական լուրջ հետևանք կարող է առաջացնել։
Նրա խոսքով` գերեվարված սիրիացի երկու անձի ցուցմունքը արդեն քրգործի շրջանակներում ձեռք բերված ապացույց է համարվում։ Բացի այդ, նախարարը հիշեցրեց` միջազգային մակարդակով նույնպես փաստվել է վարձկանների առկայությունը հակամարտության գոտում։
Հարցին, թե հայկական կողմը չի՞ պատրաստվում դիմել Հաագայի դատարան` Բադասյանը պատասխանեց, որ պետք չէ շտապել։ Նա վստահեցրեց, որ ՄԻԵԴ–ում ՀՀ ներկայացուցչի գրասենյակը զբաղվում է այդ հարցով և հենց պահը գա, քայլեր կարվեն։
Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին 1 ամիս մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Հայկական կողմին արդեն հաջողվել է գերեվարել 2 սիրիացի վարձկան–ահաբեկչի, որոնք իրենց ցուցմունքներում պատմել են, թե ինչքես է թուրքական կողմն իրենց հավաքագրել և տեղափոխել Ադրբեջան։