ԵՐԵՎԱՆ, 3 նոյեմբերի – Sputnik. Հրապարակվել են կադրեր քիչ առաջ հրթիռակոծված Շուշիից։ Լուսանկարների հեղինակը արցախցի լուսանկարիչ Դավիթ Ղահրամանյանն է, դրանք հրապարակել է Հայկական միասնական տեղեկատվական կենտրոնը։ Կադրերում երևում է փլված տներում շարունակվող հրդեհը։
Արդեն տեղեկացրել ենք, որ քաղաքացիական բնակչության շրջանում տուժածներ չկան: Բնակելի 2 տուն է հրդեհվում, տեղում աշխատում են հրշեջ փրկարարները։
Շուշիի ուղղությամբ արձակվել է «Սմերչի» 3 հրթիռ։ Միևնույն ժամանակ հրետակոծվել էր Ստեփանակերտը, որտեղ երկու քաղաքացի վիրավորում են ստացել։
Ավելի վաղ Արցախի ՊԲ-ն հայտնել էր, որ նոյեմբերի 2-ին և 2–ի լույս 3-ի գիշերվա ընթացքում ՊԲ զորքերը պաշտպանողական մարտեր են վարել արևելյան, հարավարևելյան և հարավային ուղղություններում:
Մեր ստորաբաժանումները դիպուկ կրակով նշված հատվածներում խոցել են հայտնաբերված ավտոմոբիլային տեխնիկան, կենդանի ուժը, ինչպես նաև 1 տանկ:
«Հերիք չի՞ նույն գյուղերը մի քանի անգամ ազատագրես». ադրբեջանցիները` Ալիևին
Օրվա ընթացքում թշնամական ուժերը ռազմական ավիացիա են կիրառել Մարտունի քաղաքի ուղղությամբ, հրետակոծել Շուշի քաղաքը։ Իսկ Շահումյանի շրջանում կիրառել են РСЗО տեսակի հրթիռ:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 2-ի ժամը 19։00-ի դրությամբ` հակառակորդի կրակոցների հետևանքով Արցախում զոհվել են 1177 զինծառայողներ։ Քաղաքացիական անձանց շրջանում կա 46 զոհ ու 142 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7095 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 251 անօդաչու սարք, 16 ուղղաթիռ, 25 ինքնաթիռ, 685 զրահատեխնիկա, 6 ՏՈՍ համակարգ։
Ում պետք չէ ռազմաճակատ տանել. պատմության դասերը
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Բառերը քիչ են, որ նկարագրեմ». ռազմաճակատից եկած հոր ու նորածին դստեր 1–ին հանդիպումը