ԵՐԵՎԱՆ, 3 նոյեմբերի - Sputnik. Հայաստանի ֆուտբոլի ազգային հավաքականի նախկին հարձակվող, ճանաչված ֆուտբոլիստ Յուրա Մովսիսյանն իր աջակցությունն է հայտնել Արցախին։ Նա Facebook-ի պաշտոնական էջում հրապարակել է իր և որդու լուսանկարը՝ եռագույնը ձեռքներին և կոչ է արել ճանաչել Արցախը։
«Ճանաչո՞ւմ եք ինձ և որդուս, ճանաչեք Արցախը»,- գրել է ֆուտբոլիստը։
Գրառման մեկնաբանություններում Մովսիսյան առաջարկել է մասնակցել առցանց ստորագրահավաքին՝ պահանջելով ՈւԵՖԱ-ից պատժամիջոցներ կիրառել ադրբեջանական «Ղարաբաղ» ֆուտբոլային ակումբի նկատմամբ։
Հիշեցնենք՝ ակումբի ներկայացուցիչ Նուրլան Իբրահիմովն օրերս գրառում էր արել Twitter-ի իր էջում՝ բառացիորեն կոչ անելով սպանել բոլոր հայերին՝ առանց խտրականության՝ ծերերին, կանանց, երեխաներին։ Նա նաև հրապարակայնորեն արդարացրել էր Թուրքիայի կողմից իրականացված Հայոց ցեղասպանությունը։ Հայաստանի ֆուտբոլի ֆեդերացիան արդեն իսկ բողոքի նամակ է հղել ՈՒԵՖԱ։
Նշենք, որ Յուրա Մովսիսյանը պատերազմական այս օրերին պարբերաբար սոցիալական ցանցի իր էջում գրառումներ է անում, լուսանկարներ հրապարակում՝ փորձելով իր ճանաչումն օգտագործել ի նպաստ հայրենիքի։