ԵՐԵՎԱՆ, 3 նոյեմբերի - Sputnik. ԱՄՆ իշխանությունները, առաջարկելով սկանդինավյան երկրներից խաղաղարար առաքելություն ուղարկել Լեռնային Ղարաբաղ, հավանաբար, վերջնականապես իրենց «մեծ բոսի» տեղն են դրել։ ՌԻԱ Նովոստիի հետ զրույցում նման հայտարարություն է արել ՌԴ Պետդումայի միջազգային հարաբերությունների հանձնաժողովի անդամ Ելենա Պանինան։ Նա նշել է, որ նման առաջարկ անելով՝ ԱՄՆ-ում հավանաբար մոռացել են միջազգային իրավունքի նորմերի և միջազգային ինստիտուտների մասին։
Ավելի վաղ ԱՄՆ նախագահի ազգային անվտանգության հարցերով խորհրդական Ռոբերտ Օ'Բրայենը խոսել էր Լեռնային Ղարաբաղում սկանդինավյան խաղաղապահների տեղակայման Վաշինգտոնի առաջարկի մասին: Միաժամանակ, նա նշել էր, որ հարցն անմիջապես այդ երկրների հետ է մշակվում։ Նա ընդգծել էր՝ խաղաղապահ ուժերի կազմի մեջ չպետք է լինեն Մինսկի խմբի համանախագահ երկրները, ներառյալ ԱՄՆ-ն կամ հարևան երկրները, օրինակ, Թուրքիան:
Թուրք խաղաղապահներն անընդունելի են ինչպես ՀՀ–ի, այնպես էլ ԱՄՆ-ի համար. Թրամփի խորհրդական
«ԱՄՆ իշխանությունները, հավանաբար, վերջնականապես մոռացել են ՄԱԿ-ի և այլ միջազգային կազմակերպությունների գոյության, միջազգային իրավունքի, ինքնիշխան պետությունների արժանապատվության հանդեպ հարգանքի մասին։ Նրանք, հավանաբար, վերջնականապես իրենց «մեծ բոս» են երևակայում համաշխարհային մասշտաբով և սկանդինավցիներին Ղարաբաղ են ուղարկում այնպես, կարծես պիցցա կամ խոտածածկի կտրվածք են պատվիրում», - ասել է Պանինան։
Նա ընդգծել է, որ առավել «անկաշկանդ են» ԱՄՆ կարգադրություններն այն մասին, թե որ երկրները, իրենց տեսանկյունից, չեն կարող մասնակցել խաղաղապահ առաքելության գործընթացին:
«ԱՄՆ պաշտոնատար անձանց նման հայտարարությունները ցույց են տալիս, որ արտաքին քաղաքական իրադարձությունները գնահատելիս Սպիտակ տունն ամբողջությամբ կորցրել է իրականության զգացումը», - կարծում է պատգամավորը:
Նշենք, որ Շվեդիայի իշխանությունները պաշտոնական հարցում չեն ստացել Լեռնային Ղարաբաղում խաղաղապահ ուժերին աջակցություն ցուցաբերելու վերաբերյալ։ Շվեդիայի ԱԳՆ-ում նշել են, որ երկրի կառավարությունը «ուշադրությամբ և մեծ մտահոգությամբ» հետևում է ղարաբաղյան հակամարտությանը։
Հավելենք, որ ՀՀ վարչապետ Նիկոլ Փաշինյանը բազմից անդրադարձել է թեմային, ու նշել, որ դեմ չէ հակամարտության գոտում ռուսաստանյան խաղաղապահներ տեղակայելուն։