ԵՐԵՎԱՆ, 2 նոյեմբերի — Sputnik. Մեր երկրին նախևառաջ հաշտության օրակարգ է անհրաժեշտ։ Facebook սոցցանցի իր էջում նման հայտարարություն է արել Տավուշի թեմի առաջնորդ Բագրատ եպիսկոպոս Գալստանյանը։
«Մենք պետք է սոսկ մեր մտահոգություններն արտահայտելուց գործի անցնենք՝ հանձնառու լինելով հաշտության համար՝ կրելով հանրային պատասխանատվության յուրաքանչյուրիս բաժինը»,–գրել է նա։
Բագրատ սրբազանի խոսքով` տիրոջ զորությամբ անպայման հաղթելու ենք թե՛ երևացող և թե՛ աներևույթ թշնամիներին... Սրբազանը վստահեցնում է` Աստված մեզ հետ է։
Հիշեցնենք, որ սեպտեմբերի 27–ին Ադրբեջանի սանձազերծած պատերազմում հանուն հայրենիքի և Արցախի ժողովրդի ազատության իրենց կյանքն են տվել ՀՀ ԶՈւ հոգևոր առաջնորդության սպասավոր Նարեկ սարկավագ Պետրոսյանը և Ռուստամ սարկավագ Պողոսյանը։ Վերջինս ժամկետային զինծառայող էր։
Sputnik Արմենիայի հետ զրույցում Տեր Վահրամ քահանա Մելիքյանը հայտնել էր, որ առաջնագծի հոգևորականներից 31-ամյա Հայր Գեղարդ աբեղա Հովհաննիսյանը վիրավորում է ստացել և այժմ ապաքինվում է։ Եվս մեկ հոգևորականի գտնվելու վայրը հայտնի չէ։
Հաղթում ենք. Բագրատ սրբազանը զրուցում է «զոհված» հրամանատար Լեռնիկ Բաբայանի հետ. տեսանյութ