Հոկտեմբերի 31-ին Վրաստանում կայացել են խորհրդարանական ընտրություններ: Դրանք անցել են խառը համակարգով. 120 պատգամավոր ընտրվել է համամասնական, 31-ը՝ մեծամասնական համակարգով: 150 մանդատի համար պայքարում մասնակցել է 48 կուսակցություն եւ երկու դաշինք:
Ըստ Վրաստանի Կենտրոնական ընտրական հանձնաժողովի կայքում հրապարակված տվյալների՝ «Վրացական երազանք» կուսակցությունն առաջատարն է ընտրություններում՝ ստանալով ընտրողների ձայների 48 տոկոսը, միամանդատ շրջաններում իշխող ուժի թեկնածուները նույնպես առաջատարն են: Ըստ Վրաստանի ԿԸՀ վյալների՝ միայն յոթ մեծանասմական շրջաններում պահանջվում է անցկացնել ընտրությունների երկրորդ փուլ հաղթողին որոշելու համար:
Ջոնի Մելիքյանի գնահատմամաբ՝ ընտրությունների արդյունքը կանխատեսելի էր, ինչպես և սպասելի էր ընդդիմության արձագանքը: «Վրացական երազանքը» կարողացավ այս ամիսների ընթացքում իր վարկանիշը բարձրացնել՝ էֆեկտիվ պայքարելով կորոնավիրուսի դեմ: Չնայած վերջին երկու ամիսներին, երբ նախընտրական պայքարը մեկնարկեց, սկսվեց կորոնավիրուսի երկրորդ ալիքը:
Այսօր պետք է արձանագրենք, որ «Վրացական երազանքը» 48 տոկոս ձայն ունի՝ մի քանի տասնյակ մանդատ, բացի այդ, մեծամասնականով առաջադրված 30 թեկնածուների կեսն անցել են խորհրդարան։ Այսպիսով, իշխող ուժը յոթ տասնյակից ավելի ձայն է ստանում խորհրդարանում և հնարավորություն՝ կառավարություն ձևավորելու:
Մելիքյանը հիշեցնում է, որ պետք է սպասել նաև շրջանների կեսում մեծամասնական թեկնածուների ընտրությունների երկրորդ փուլի արդյունքերին:
«Սա սպասելի չէր, որ կեսում կանցկացվի ընտրությունների երկրորդ փուլ, և դա արտահայտում է հակաիշխանական տրամադրությունները բնակչության շրջանում: Ընդդիմությունը դրանով շանս է ստանում ավելացնելու մանդատները խորհրդարանում, և բողոքի ցույցերը միտված են հենց դրան. Սաակաշվիլին պետք է կարողանա համոզել ընտրազանգվածին, որ երկրոդ փուլի ժամանակ աջակցեն «Միացյալ ազգային շարժման» թեկնածուներին: Միաժամանակ, իշխանությունը նույնպես գործելու է և փորձելու է ադմինիստրատիվ և այլ ռեսուրսներով այդ շրջանների մեծամասնությունում երկրորդ փուլում հաղթանակի հասնել»,-նշում է Մելիքյանը:
Ինչ կփոխվի Վրաստանի արտաքին քաղաքականության մեջ ընտրություններից հետո. Մելիքյանը վստահ է՝ կլինի հին-նոր կառավարություն:
«Վարչապետը չի փոխվելու: Կլինեն փոփոխություններ նախարարների շրջանում: Թե արտաքին թե ներքին քաղաքականության մեջ փոփոխություններ չեն լինի»,-կարծում է Մելիքյանը:
Ըստ վրացագետի՝ Վրաստանի իշխանությունները մինչ այժմ կենտրոնացած էին երկրի ներքին խնդիրների վրա և արտաքին հարաբերություններին ուշադրություն չէին դարձնում. այն իներցիայով էր առաջ գնում: Իսկ այժմ՝ ընտրությունների ավարտից հետո, ըստ Մելիքյանի, Վրաստանի իշխանություններն արդեն կաշկանդված չեն լինի ներքին քաղաքական պրոցեսներով և ավելի ակտիվ քայլեր կանեն արտաքին քաղաքականության մեջ: