ԵՐԵՎԱՆ, 29 հոկտեմբերի – Sputnik. Հայաստանի վարչապետ Նիկոլ Փաշինյանը հաստատել է, որ Հայաստանի և Արցախի սահմանին ռուս սահմանապահներ են տեղակայված։ Ընդ որում, նա բացատրել է, որ այդտեղ ոչ մի զարմանալի բան չկա։ Տեղեկությունը հայտնում է ՌԻԱ Նովոստին՝ հղում անելով իսպանացի լրագրող Պաբլո Գոնսալեզին։
Իսպանական EFE գործակալության լրագրող Պաբլո Գոնսալեզը ՀՀ վարչապետին խնդրել է բացատրել Հայաստանի սահմանին՝ Արցախի հատվածում արված ռուս զինվորականների լուսանկարների (որոնք հայտնվել են սոցցանցերում) փաստը։
«Այդտեղ ոչ մի նոր բան չկա։ Ռուս սահմանապահները կանգնած են Թուրքիայի և Իրանի հետ Հայաստանի սահմաններին։ Այսինքն, միշտ էլ այդպես է եղել։ Եվ հիմա, իրադարձությունների վերջին զարգացումների հետ կապված, ռուս սահմանապահները կանգնած են նաև Հայաստանի հարավարևմտյան սահմանին։ Այսինքն, ըստ էության, այդտեղ որևէ նորություն չկա»,-պատասխանել է Փաշինյանը։
Վարչապետի մամուլի ծառայությունից ՌԻԱ Նովոստիին հաստատել են, որ հարցազրույցը տեսագրվել է հոկտեմբերի 20-ին։ Հարցազրույցի՝ EFE գործակալության կողմից հրապարակված վերջնական տարբերակում այդ հատվածը չի ներառվել, սակայն Գոնսալեզն այն ցույց է տվել ՌԻԱ Նովոստիի թղթակցին։ Իսպանացի լրագրողը Հայաստանի վարչապետի այդ խոսքերը տեղադրել է Twitter-ի իր էջում։
Հիշեցնենք` սեպտեմբերի 27-ի վաղ առավոտյան Ադրբեջանը, Թուրքիայի աջակցությամբ, լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 28-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1068 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 223 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 618 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին