ԵՐԵՎԱՆ, 29 հոկտեմբեր - Sputnik. Արցախի նախագահ Արայիկ Հարությունյանը, ըստ էության, մարտակոչ է հնչեցրել, ինչը նորմալ է։ Լրագրողների հետ ճեպազրույցի ժամանակ ասաց ՀՀ ՊՆ խոսնակ Արծրուն Հովհաննիսյանը` անդրադառնալով այսօր Շուշիի Ղազանչեցոց եկեղեցու մոտից Հարությունյանի տեսաուղերձին։
«Նման իրավիճակում երկրի ղեկավարները, ԶՈւ–երի հրամանատարները կարող են ամեն օր էլ մարտակոչ հնչեցնել, քանի որ մարտական գործողությունները շարունակվում են։ Ճիշտ է, հակառակորդի հիմնական հարձակողական և խոշորածավալ կարողություն ունեցող զորախմբերի մեջքը կոտրված է, սակայն դիվերսոն փոքր խմբերը փորձելու են նման քայլեր իրականացնել։ Գրեթե ամեն օր նման քայլեր իրականացվում են»,–ասաց Հովհաննիսյանը։
Հարցին, թե որ ուղղությունները նկատի ուներ Հարությունյանը, երբ ասում էր, որ հակառակորդը Շուշիից ընդամենը 5 կմ հեռավորության վրա է գտնվում` Հովհաննիսյանը պատասխանեց, որ խոսքը Սղնախ և հարակից գյուղերի մասին է։
Հովհաննիսյանը նշեց, որ եթե չեն մեկնաբանում որևէ այլ ուղղությամբ դիվերսիոն գործողությունները և դրանց տապալումը, դա չի նշանակում, որ ուրիշ ուղղություններով ինչ–որ քայլեր չեն արվում։
Մարտերը շարունակվում են ամենուր և ամեն տեղ, հավելեց ՊՆ ներկայացուցիչը։
Հիշեցնենք, որ Արայիկ Հարությունյանն այսօր Շուշիից հանդես եկավ տեսաուղերձով` ասելով, որ թշնամու գերնպատակն է գրավել Շուշին, և այս պահին թշնամին քաղաքից 5 կմ է հեռու։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 29-ի ժամը 18։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 226 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 632 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին