ԵՐԵՎԱՆ, 28 հոկտեմբերի – Sputnik. ՄԱԿ-ի գլխավոր քարտուղար Անտոնիո Գուտերեշը Ղարաբաղյան հակամարտության գոտում անհապաղ կրակը դադարեցնելու կոչ է արել։ Տեղեկությունն այսօր հայտնել է կազմակերպության ղեկավարի ներկայացուցիչ Ստեֆամ Դյուժարիկը։
«Մենք կրկնում ենք մարտերն անհապաղ դադարեցնելու և հրադադարի պայմանավորվածությունները կատարելու վերաբերյալ գլխավոր քարտուղարի՝ հակամարտության կողմերին ուղղված կոչը»,-ասել է նա։
Գլխավոր քարտուղարի ներկայացուցիչը Ղարաբաղյան հակամարտության կողմերին կոչ է արել նաև պաշտպանել խաղաղ բնակիչներին և քաղաքացիական ենթակառուցվածքները։
«Ռազմական գործողություններն անընդունելի են և պետք է կանգ առնեն»,-ընդգծել է Դյուժարիկը։
Հիշեցնենք` սեպտեմբերի 27-ի վաղ առավոտյան Ադրբեջանը, Թուրքիայի աջակցությամբ, լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 28-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1068 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 223 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 618 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին