ԵՐԵՎԱՆ, 28 հոկտեմբերի — Sputnik. ՌԴ ԱԳ նախարար Սերգեյ Լավրովն իր ֆրանսիացի գործընկեր Ժան Իվ Լե Դրիանի հետ հեռախոսազրույցում քննարկել է Ղարաբաղում իրավիճակի հետագա զարգացման հնարավոր սցենարները: Տեղեկությունը հայտնում է ՌԴ ԱԳՆ-ը:
Կողմերը հանգամանորեն քննարկել են հակամարտության գոտում առկա իրավիճակը, լուրջ մտահոգություն հայտնել չդադարող լայնածավալ մարտական գործողությունների վերաբերյալ:
Լավրովն ու Դրիանը հակամարտող կողմերին շուտափույթ ու լիակատար հրադադարի և լարվածության թուլացման կոչ են արել, ընդգծել հակամարտության դիվանագիտական լուծման անայլընտրանքայնությունն ու ԵԱՀԿ Մինսկի խմբի համանախագահների հետագա համաձայնեցված գործողությունների անհրաժեշտությունը:
«ՌԴ-ի և Ֆրանսիայի ԱԳ նախարարները հատուկ կարևորել են հակամարտող կողմերի՝ ռազմական գործողությունների դադարեցման քաղաքական կամքի դրսևորումը», - ասված է հաղորդագրության մեջ:
Նախարարները քննարկել են նաև Ֆրանսիայի ԱԳ նախարարի հնարավոր այցը Ռուսաստան և երկկողմ օրակարգի մի շարք այլ արդիական հարցեր:
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվեցին, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակեց հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Հոկտեմբերի 26-ին ՀՀ ԱԳՆ–ն հայտարարեց, որ Հայաստանի և Ադրբեջանի արտգործնախարարները հումանիտար հրադադարի հաստատման երրորդ ժամկետի մասին են պայմանավորվել, որը պետք է ուժի մեջ մտներ 2020թ. հոկտեմբերի 26-ին, տեղական ժամանակով 08:00-ին։ Սակայն Ադրբեջանը խախտեց նաև երրորդ պայմանավորվածությունը։