ԱԱԾ-ն բացահայտել է Արցախից Հայաստան անօրինական ճանապարհով զինամթերք տեղափոխելու դեպքեր

ԵՐԵՎԱՆ, 28 հոկտեմբերի – Sputnik. Վերջին օրերին ՀՀ ազգային անվտանգության ծառայության կողմից բացահայտվել և կանխվել են Արցախի Հանրապետությունից դեպի Հայաստանի Հանրապետություն անօրինական  ճանապարհով զենք-զինամթերք տեղափոխելու մի շարք դեպքեր: Տեղեկությունը հայտնում են ՀՀ ԱԱԾ մամուլի ծառայությունից։

«Հավելենք, որ առանձին դեպքերում ներգրավված են եղել նաև քրեական ենթամշակույթ կրող անձինք, ովքեր համանման քայլեր են ձեռնարկել ռազմական գործողություններին մասնակցող որոշ անձանց միջոցով»,–ասված է հայտարարության մեջ:

ԱԱԾ–ն, ընդգծելով այս վճռորոշ ժամանակահատվածում հակաօրինական յուրաքանչյուր արարքի անթույլատրելիությունը, զգուշացնում է զերծ մնալ նմանատիպ գործողությունների իրականացումից, որոնք կարող են ուղղակիորեն վնասել Հայաստանի Հանրապետության և Արցախի Հանրապետության քաղաքացիների անվտանգությանը:

ԱԱԾ–ից տեղեկացնում են, որ նմանատիպ բոլոր երևույթները գտնվում են ՀՀ ազգային անվտանգության ծառայության, ինչպես նաև ՀՀ ոստիկանության շուրջօրյա հսկողության ներքո և ունենալու են իրենց համարժեք իրավական գնահատականը՝ ամենակոշտ գործիքակազմի կիրառմամբ:

ԱԱԾ ևս մեկ պաշտոնյա է ազատվել պաշտոնից