ԵՐԵՎԱՆ, 26 հոկտեմբերի – Sputnik. ՀՀ պաշտպանության նախարարության ներկայացուցիչ Արծրուն Հովհաննիսյանը ճեպազրույցի ընթացքում, անդրադառնալով Ադրբեջանի նախագահ Իլհամ Ալիևի այսօրվա բացահայտ սպառնալիքին, ասաց` մենք Ադրբեջանի սպառնալիքներից չենք զարմանում և չենք վախենում։
Ալիևն այսօր սպառնացել է, որ եթե դրսից իրենց դեմ ագրեսիա լինի, ապա կտեսնեն F-16–ները, և կրկին հերքել հայկական կողմի դեմ թուրքական F-16–ների կիրառությունը։
«Ադրբեջանի սպառնալիքներն ու գործողությունները տեսնում ենք մոտ մեկ ամիս»,–ասաց Հովհաննիսյանը։
Նա նշեց, որ երեկ ամերիկյան հայտնի բլոգերից մեկը հրապարակել էր ամերիկյան արբանյակային լուսանկարներ, որտեղ երևում էին Ադրբեջանի օդանավակայանում կայանված թուրքական F-16–երի։
«Սա որպես ապացույց լիովին բավարար է, բայց մենք ապացույցներ շատ ունենք և տիրապետում ենք տեղեկություններին, թե ինչպես են F-16–ները կոնկրետ կիրառվել, ինչպես նաև կիրառվել են գերճշգրիտ հրթիռներ, այդ թվում` կոնկրետ մարտական խնդիրներ լուծող հրթիռներ։ Այնպես որ հայկական կողմը ապացույցների կարիք չունի»,–ասաց նա։
Հովհաննիսյանն անդրադարձավ նաև հայկական ԱԹՍ–ներին` նշելով, որ դրանց կիրառությունը մեծ չէ, բայց դրանք էլ ունեն իրենց դերակատարությունը, և հայկական միտքն այս ուղղությամբ շարունակում է աշխատել։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 26-ի ժամը 13։30-ի դրությամբ` հակառակորդի կրակոցների հետևանքով Արցախում զոհվել են 974 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6674 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 24 ինքնաթիռ, 16 ուղղաթիռ, 220 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 600 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին