ԵՐԵՎԱՆ, 22 հոկտեմբերի – Sputnik.Հայաստանի կառավարությունը Եվրասիական տնտեսական հանձնաժողովի խորհրդի առաջիկա նիստում հանդես կգա Թուրքիային ԵԱՏՄ սակագնային արտոնություններից զրկելու առաջարկով։
Ինչպես հայտնում է ՀՀ կառավարության պաշտոնական կայքը, Թուրքիան ԵԱՏՄ սակագնային արտոնությունների միասնական համակարգից օգտվող երկրների ցանկից հանելու նախաձեռնությամբ հանդես է եկել Հայաստանի փոխվարչապետ Մհեր Գրիգորյանը։
Համաձայն Եվրասիական տնտեսական միության մասին պայմանագրի 36-րդ հոդվածի՝ ԵԱՏՄ անդամ պետությունների կողմից տրամադրվում են սակագնային արտոնություններ` զարգացող և առավել թույլ զարգացած երկրների ծագում ունեցող ապրանքների նկատմամբ։
Արտոնություններից օգտվող երկրների ցանկերը հաստատվել են 2009 թվականին Մաքսային միության հանձնաժողովի որոշմամբ, որի համաձայն արտոնություններից օգտվող երկրները ներկայում 103–ն են։
Թուրքիայից դոնդողանյութ ու կոլագեն կմատակարարվի ԵԱՏՄ երկրներ
Հիշեցնենք` հոկտեմբերի 20-ին Հայաստանի Հանրապետության կառավարությունը որոշում էր ընդունել արգելելու թուրքական ծագում ունեցող ապրանքների ներմուծումը։ Որոշումն ուժի մեջ կմտնի 2020 թվականի դեկտեմբերի 31-ից:
Սեպտեմբերի 27-ից Արցախի դեմ թուրք–ադրբեջանական ու ահաբեկչական ուժերի սանձազերծած պատերազմի առաջին իսկ օրերից հայաստանյան սպառողներն ու խոշոր առևտրի ցանցերն արշավ սկսեցին թուրքական ապրանքների վաճառքի դեմ։
Ի պատասխան հանրային դժոգհության՝ ՀՀ էկոնոմիկայի նախարարությունը համապատասխան որոշման նախագիծ ներկայացրեց հանրային քննարկման։ Իսկ հոկտեմբերի 20-ին այն արդեն ընդունվեց ՀՀ կառավարության կողմից։
Նշենք, որ 2019 թվականին Թուրքիայից Հայաստանի Հանրապետություն ներմուծումն ըստ ծագման երկրի հատկանիշի կազմել է 268.1 մլն ԱՄՆ դոլար։
Հայաստանի մոտ 180 քաղաքացի Թուրքիայից հայրենիք են վերադառնում. ԱԳՆ
Թուրքիայից մեր երկիր հիմնականում ներմուծվում է hագուստ (69.4 մլն դոլար), ցիտրուսային մրգեր (10.3 մլն դոլար), մեքենաներ, սարքավորումներ և մեխանիզմներ` էլեկտրական ջեռուցիչ, սառնարան (35.3 մլն դոլար), նավթ և նավթամթերք (24.3 մլն դոլար), քիմիայի և դրա հետ կապված այլ նյութեր։