ԵՐԵՎԱՆ, 21 հոկտեմբերի – Sputnik. Ռուսաստանի փոխարտգործնախարար Անդրեյ Ռուդենկոն այսօր լրագրողներին ասել է, որ ռուսական կողմը ողջունում է Հայաստանի և Ադրբեջանի ղեկավարության ՝ խաղաղության հասնելու ցանկությունը։ Տեղեկությունը հայտնում է ՌԻԱ Նովոստին։
«Մենք լսել ենք այդ հարցազրույցները (Հայաստանի վարչապետի և Ադրբեջանի նախագահի՝ Մոսկվա մեկնելու պատրաստակամության մասին)։ Ողջունում ենք խաղաղության հասնելու նրանց ցանկությունը», - ասել է նա։
Ռուդենկոյի խոսքով՝ անհրաժեշտ է պահպանել հրադադարի ռեժիմը և դադարեցնել խաղաղ բնակչության տառապանքները:
Հիշեցնենք` հոկտեմբերի 19-ին պարզ դարձավ, որ Նիկոլ Փաշինյանն ու Իլհամ Ալիևը պատրաստ են հանդիպել Մոսկվայում։ Նրանք այդ մասին ասել էին ՏԱՍՍ–ին տված հարցազրույցում։
Երեկ Մոսկվա է մեկնել ՀՀ արտգործնախարար Զոհրաբ Մնացականյանը։ Ռուսաստանի մայրաքաղաքում է նաև Ադրբեջանի արտգործնախարար Ջեյհուն Բայրամովը։
Ավելի վաղ տեղեկացրել էինք, որ Հայաստանի և Ադրբեջանի արտաքին գործերի նախարարները Վաշինգտոնում հոկտեմբերի 23-ին առանձին հանդիպումներ կունենան ԱՄՆ պետքարտուղար Մայք Պոմպեոյի հետ։