ԵՐԵՎԱՆ, 21 հոկտեմբերի – Sputnik. Լոռու մարզպետ Անդրեյ Ղուկասյանը կամավորագրվել է։
«Միանալով ՀՀ վարչապետ Նիկոլ Փաշինյանի կոչին, վայրկյան անգամ չվարանելով՝ կամավորագրվում եմ հայրենիքիս պաշտպանության սուրբ գործին»,– Facebook-ում գրել է նա։
Ղուկասյանը հայտնել է, որ րոպեներ առաջ Լոռու համայնքապետների հետ անցկացված մարզխորհրդի նիստում կամավորագրվելու որոշմանը միացել են նաև մարզի համայնքների ղեկավարները։
Նրանք վաղը կներկայացնեն իրենց կողմից ղեկավարվելիք կամավորական ջոկատների կազմերը:
«Սիրելի՛ լոռեցիներ, այլևս չկա հետդարձի ճանապարհ: Բոլոր նրանք, ովքեր հասկանում են պահի լրջությունը և կարող են զենք վերցնել, խնդրում եմ այս պահից սկսած՝ դիմել Լոռու մարզպետարան և համայնքապետարաններ: Ես հավատում եմ մեր միասնականությանը, ես հավատում եմ, որ Հայրենիքի պաշտպանությունը յուրաքանչյուր հայորդու համար վեր է ամեն ինչից: Եվ ուրեմն ի զեն»,– հայտարարել է Լոռու մարզպետը։
Վանաձորի քաղաքապետ Մամիկոն Ասլանյանը ևս Facebook-ում հայտնել է Վանաձորում կամավորական ջոկատ ձևավորելու իր որոշման մասին։
«Մենք պարտավոր ենք ուս ուսի տալ և հաղթանակով պսակել սրբազան պատերազմը, որը մեզ պարտադրել են»,– գրել է նա և տեղեկացրել, որ «Վանաձոր» ջոկատին անդամագրվել ցանկացողները վաղը՝ ժամը 9:00-ից մինչև 18:00-ն, կարող են դիմել Վանաձորի համայնքապետարանի աշխատակազմի քարտուղար Արթուր Օհանյանին: Անդամագրվել կարող է ցանկացած քաղաքացի:
ՀՀ վարչապետ Նիկոլ Փաշինյանն այսօր Facebook սոցցանցի ուղիղ եթերում, անդրադառնալով Արցախում ընթացող մարտական գործողություններին, հայտարարել էր, որ ստեղծված իրավիճակում հայկական կողմի անելիքը մինչև վերջ պայքարելն է։
Առանց Արցախի չկա Հայաստան. Փաշինյանը նշեց` որն է ստեղծված իրավիճակում մեր անելիքը
Նա բոլոր քաղաքապետներին, գյուղապետներին, տեղական ինքնակառավարման բոլոր մարմինների ղեկավարներին կոչ էր արել, որ ստանձնեն լիդերություն, ձևավորեն կամավորական ջոկատներ, որոնք կիրականացնեն հայ ժողովրդի իրավունքի պաշտպանության գործը։
Ղարաբաղյան հիմնահարցի դիվանագիտական լուծման մասին այս փուլում խոսելն անիմաստ է. Փաշինյան
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 21-ի ժամը 16:40-ի դրությամբ` հակառակորդի կրակոցների հետևանքով զոհվել են 834 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը