ԵՐԵՎԱՆ, 20 հոկտեմբերի - Sputnik. Երևանի ավագանու «Իմ քայլը» խմբակցության անդամ Լևոն Զաքարյանը Երևանի ավագանու այսօր կայացած նիստի ժամանակ անդրադարձավ կորոնավիրուսի աննախադեպ աճին։
Նրա խոսքով` վերջին շրջանում կան հասարակական տրանսպորտի օրինազանց վարորդներ, որոնք դիմակ չեն դնում։
«Դիմակ չկրող վարորդը չի էլ զգուշացնում առանց դիմակի տրանսպորտ բարձրացողին։ Սա տեղի է ունեցել իմ աչքի առաջ։ Բացի այդ, հիվանդանոցներում պետք է սահմանափակվեն տեսակցությունները, քանի որ հիվանդասենյակներում բազմաթիվ մարդիկ են հավաքվում։ Այդպիսով, մենք վտանգի տակ են դնում բժիշկների առողջությունը, այն բժիշկների, որոնք այսօր զինվորների կյանքն են փրկում»,–ասաց Զաքարյանը։
Ի պատասխան Երևանի քաղաքապետ Հայկ Մարությանն էլ ասաց, որ երկու օր առաջ համայնքապատկան բոլոր կազմակերպություններին ևս մեկ անգամ խիստ կերպով զգուշացվել է, որ պետք է հետևեն անվտանգության կանոններին։
Ի դեպ, այսօր կայացած նիստի ժամանակ առաջին անգամ տեղի ունեցավ մտքերի փոխանակում։
Երևանի ավագանու հաջորդ նիստը տեղի կունենա նոյեմբերի 24–ին, ժամը 11-ին։
Հիշեցնենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 1234–ով և դարձել 65 694։