ԵՐԵՎԱՆ, 18 հոկտեմբերի – Sputnik. Ադրբեջանը դարձյալ չպահպանեց զինադադարի պայմանավորվածությունը, որն այս անգամ առաջարկել էր ֆրանսիական կողմը։ Այսօր հրավիրած ասուլիսում հայտարարեց ՀՀ ՊՆ ներկայացուցիչ Արծրուն Հովհաննիսյանը։
«Դեռ վաղ առավոտից մարտական գործողությունները շարունակվեցին նույն ուղղություններով։ Սկզբից` հյուսիսային կողմում հերթական անգամ հարձակման փորձ կատարեցին, ջախջախվեցին, հետ շպրտվեցին` որևէ հաջողություն չունենալով։ Նույն ժամանակ հարավային ուղղությամբ երկու առանձին հատվածներում փորձել են հարձակողական գործողություններ ծավալել։ Մեկ ուղղությամբ հստակորեն ընկնելով հայկական հրետանու կրակի տակ`փախուստի են դիմել, հետ են շպրտվել` կրելով զինտեխնիկայի ու մեծաքանակ զինամթերքի կորուստ»,– ասաց Հովհաննիսյանը։
Նա հաստատեց, որ հակառակորդը հարավային ուղղությամբ որոշակի առաջխաղացում ունի, բայց չցանկացավ մանրամասներ հայտնել բնագծերի, տեղանքների անունների վերաբերյալ։ Հովհաննիսյանը նաև հայտնեց, որ օրվա ընթացքում Ադրբեջանը դարձյալ կիրառել է օդային տարբեր միջոցներ, այդ թվում` ԱԹՍ–ներ։ «Այսօր մինչև 20։30–ը խոցվել է 9 ԱԹՍ, որից 2-ը` ՀՀ տարածքում»,– ասաց նա։
ՊՆ ներկայացուցիչը նաև հայտնեց, որ թեժ մարտերը հիմա էլ շարունակվում են, հատկապես` հարավային ուղղությամբ։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 18-ի ժամը 19:00-ի դրությամբ` հակառակորդի կրակոցների հետևանքով զոհվել են 710 զինծառայողներ և 36 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6109 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 22 ինքնաթիռ, 16 ուղղաթիռ, 192 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 558 տանկ և ՀՄՄ:
Ղազանչեցոցը 2 անգամ վերականգնած ճարտարապետը վստահեցնում է` եկեղեցին ավերված երկար չի մնա
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
«Գրադի» կրակի տակ. ինչպես են տարեց տղամարդիկ ապրում Մարտունու ապաստարաններից մեկում