ԵՐԵՎԱՆ, 14 հոկտեմբերի – Sputnik. Հումանիտար հրադադարի մասին պայմանավորվածությունից մեկ օր հետո Ադրբեջանը, օգտվելով առիթից, սկսել է ավելի հուժկու մարտական գործողություններ իրականացնել։ Այս մասին հայտարարեց Արցախի նախագահ Արայիկ Հարությունյանն իր տեսաուղերձում։
«Հակառակորդը լայնածավալ գործողություններ է իրականացնում սահմանի ողջ երկայնքով, հատկապես հարավային ուղղությամբ։ Հակառակորդին հաջողվել է ինչ–որ տեղ մխրճվել, ունենալ առավելություններ և օր օրի ճակատը տեղափոխել ավելի խորը ճակատներ»,–ասաց Հարությունյանը։
Նրա խոսքով` Ադրբեջանին զինադադար ստիպելու համար կա միայն մեկ ճանապարհ` պարտադրել դա։
Հարությունյանը հիշեցրեց, որ Հայաստանը կողմ է առանց նախապայմանների սկսել հումանիտար հրադադարը կյանքի կոչել, և հետագայում խաղաղ բանակցություններ շարունակել։ Նա նշեց` չնայած արդեն իսկ անհնարին է խաղաղ ճանապարհով այս հարցը լուծել, բայց ուշ չէ։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 14-ի ժամը 11:00-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը