ԵՐԵՎԱՆ, 11 հոկտեմբերի - Sputnik. Ադրբեջանը կրակ է բացել շտապօգնության մեքենայի վրա։ Տեղեկությունը Facebook–ի իր էջում հայտնել է Հայաստանի առողջապահության նախարար Արսեն Թորոսյանի խորհրդական Աշոտ Սարգսյանը։
«Առաջնագծից այսօր վերադարձած մեր շտապ օգնության մեքենաներից է, որով տեղափոխվում էին վիրավորների։ Եկեղեցու և շենքերի վրա կրակողը բուժաշխատողներին էլ կթիրախավորի։ Աշխարհի օրենքն է` պատերազմի ժամանակ բուժաշխատողները անձեռնմխելի են։ Սա կոչվում է տեռորիզմ», – գրել է Սարգսյանը։
Մեքենայի վրա հստակ երևում է կարմիր խաչը։ Չնայած դրան` մեքենայի ուղղությամբ կրակ է բացվել, կրակածների հետքերը նկարված և հրապարակված են։ Կրակի հետևանքով տուժածներ չկան։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 11-ի ժամը 11։00-ի դրությամբ` հակառակորդի կրակոցների հետևանքով զոհվել են ավելի քան 400 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4719 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 166 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 510 տանկ և ՀՄՄ:
Ինչին պետք է ընտելանանք, եթե Ադրբեջանի հետ պատերազմը երկարի
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հրադադար, բայց ոչ խաղաղություն. ի՞նչ խնդիր պետք է լուծի բանակը արցախյան պատերազմից հետո