ԵՐԵՎԱՆ, 10 հոկտեմբերի – Sputnik. Սննդամթերքի անվտանգության տեսչական մարմնի (ՍԱՏՄ) նախկին ղեկավար Գեորգի Ավետիսյանը կրկին վերականգնվել է նույն պաշտոնում։ Համապատասխան որոշումը հրապարակվել է կառավարության պաշտոնական կայքէջում։
«Ղեկավարվելով «Տեսչական մարմինների մասին» Հայաստանի Հանրապետության օրենքի 8-րդ հոդվածի 1-ին մասով՝
Գեորգի Ավետիսյանին նշանակել սննդամթերքի անվտանգության տեսչական մարմնի ղեկավար»,–ասված է ՀՀ վարչապետ Նիկոլ Փաշինյանի` հոկտեմբերի 8–ին ընդունած որոշման մեջ։
Նշենք, որ Ավետիսյանը ՍԱՏՄ ղեկավարի պաշտոնից ազատվել էր մի քանի օր առաջ` սեպտեմբերի 24–ին։
Նույն օրը Փաշինյանը հանդիպում էր ունեցել ՍԱՏՄ ղեկավարի հետ, որը նրան ներկայացրել էր 2019–ի գործունության և 2020–ի առաջին 8 ամսվա աշխատանքների հաշվետվությունը:
Facebook–յան իր էջում անդրադառնալով իր ազատման–նշանակման փաստին` Գեորգի Ավետիսյանը գրել է. «Ամփոփելով իմ ազատման և նշանակման հարցը ասեմ, որ ազատման պատճառ դարձավ զուտ այն փաստը, որ տարատեսակ խոսակցություններ են եղել իմ նշանակման հետ կապված։ Ես շատ երկար ժամանակ ցանկանում էի, նոր կարգով նշանակվել, ևս մեկ անգամ մրցույթ անցնել, ինչով նաև վերջ դնել այդ անլուրջ զրույց-բամբասանքներին: Ցավում եմ, որ համընկավ այս ժամանակահատվածի հետ, բայց դիմումն արդեն գրել էի»,–գրել է Ավետիսյանը` հավելելով, որ շնորհակալ է բոլոր անհանգստացողներից և ուրախցողներից։
Ավետիսյանը ՍԱՏՄ ղեկավարի պաշտոնում նշանակվել էր «թավշյա հեղափոխությունից» հետո` 2018թ. հունիսի 22-ին։