ԵՐԵՎԱՆ, 9 հոկտեմբերի — Sputnik. Շուշիի Սուրբ Ամենափրկիչ Ղազանչեցոց վանքի հրետակոծման հարցով ՀՀ ԿԳՄՍ նախարար Արայիկ Հարությունյանը նամակով դիմել է մշակութային ժառանգության պաշտպանությամբ զբաղվող միջազգային տարբեր կառույցների, այդ թվում՝ ՅՈՒՆԵՍԿՕ–ի գլխավոր տնօրենին՝ այս հեղինակավոր կառույցի ուշադրությունը հրավիրելով Ադրբեջանի ցեղասպան ձեռագրի մշակութային բաղադրիչի վրա:
Տեղեկությունը Facebook-ում հայտնել է նախարարը՝ գրելով. «Ներկայացրել եմ այս օրերին Ադրբեջանի կողմից սանձազերծված լայնածավալ ագրեսիայի շրջանակներում Տիգրանակերտի հելենիստական և վաղ միջնադարյան շրջանի հայկական մշակույթի կարևորագույն հուշարձանային համալիրի և հայկական ճարտարապետության գոհար Շուշիի Սուրբ Ամենափրկիչ Ղազանչեցոց վանքի հրետակոծման փաստերը»:
Նախարարը հայտնում է, որ նամակում հիշեցրել է նաև Նախիջանում հայկական մշակութային ժառանգության բնաջնջման փաստը:
«Միաժամանակ նույն Շուշիում մուսուլմանական մզկիթի վերակառուցման օրինակով ցույց եմ տվել մշակութային արժեքների պաշտպանության առումով միանգամայն հակոտնյա իրավիճակը, որն առկա է ազատ Արցախի Հանրապետությունում»,- հայտնում է Հարությունյանը:
ԿԳՄՍ նախարարը փաստում է, որ մշակութային ժառանգության միտումնավոր թիրախավորումը պատերազմական հանցագործություն է և ցեղասպան քաղաքականության դրսևորում:
Շուշիում վիրավորված ռուս լրագրողի վիճակը շատ ծանր է․ բժիշկ
Արայիկ Հարությունյանը ՅՈՒՆԵՍԿՕ-ին կոչ է արել վճռականորեն և խստագույնս դատապարտել ադրբեջանական շարունակական ագրեսիան, քաղաքացիական բնակչության թիրախավորումը, մշակութային ցեղասպանությունը, որի զոհ կարող են դառնալ Արցախի Հանրապետության շուրջ 4 հազար հուշարձանները:
«Իրականում ինձ փրկեց Շուշիի բժիշկը». Արցախում վիրավորված ռուս լրագրողն ապաքինվում է
Հիշեցնենք՝ հոկտեմբերի 8-ին Ադրբեջանը հրթիռակոծել էր Շուշիի Սուրբ Ղազանչեցոց եկեղեցին, ապա սպասել մինչև այնտեղ հավաքվեն մարդիկ` տեսնելու ավերածությունը, և նորից է հարված հասցրել տաճարին։ Առաջին հարվածի ժամանակ եկեղեցում պատսպարված ընտանիք էր եղել, որոնք, բարեբախտաբար չէին տուժել։
Երկորորդ հրթիռահարման ժամանակ եկեղեցում եղել են տեղում աշխատող լրագրողները, որոնք տարբեր աստիճանի վնասվածքներ էին ստացել:
Մասնագետների ու ռազմական փորձագետների դիտարկմամբ` հակառակորդը ուղիղ նշանառությամբ է հրթիռահարել Սուրբ Ղազանչեցոց եկեղեցին: