ԵՐԵՎԱՆ, 8 հոկտեմբերի – Sputnik. Արցախի տեղեկատվական շտաբը հայտնում է, որ ադրբեջանական զինված ուժերի կողմից Շուշիի Սուրբ Ղազանչեցոց եկեղեցու երկրորդ հրթիռակոծության արդյունքում ծանր վիրավորում է ստացել ռուս լրագրող Յուրի Պետրովիչ Կոտենոկը։
«Լրագրողի կյանքի համար այժմ պայքարում են արցախցի բժիշկները»,–նշված է հաղորդագրության մեջ։
Միաժամանակ, Արցախի նախագահի խոսնակ Վահրամ Պողոսյանը Facebook–ի իր էջում հայտնում է, որ երկու անգամ են հարվածել Ղազանչեցոցին:
«Ադրբեջանական ահաբեկչական բանակը գործում է լրիվ իգիլի ոճով: Մեր պայքարը ևս մեկ անգամ պնդում ենք` հակաահաբեկչական է, որին պարտավոր է միանալ քաղաքակիրթ աշխարհը»,–գրել է նա։
Ադրբեջանը Սուրբ Ղազանչեցոցը հրթիռակոծել էր նաև այսօր առավոտյան, այդ պահին ներսում երեխաներ էին եղել։ Բարեբախտաբար, նախորդ անգամ տուժածներ չկային։
Դրանից հետո հրթիռակոծության հետևանքները լուսաբանելու համար եկեղեցի էին եկել Արցախում աշխատող տեղական ու միջազգային լրատվամիջոցները:
Չնայած այն հանգամանքին, որ տեղում մեծ թվով լրագրողներ էին աշխատում, ադրբեջանական զինված ուժերը երկրորդ անգամ էին հրթիռակոծության ենթարկել Շուշիի Սուրբ Ղազանչեցոց եկեղեցին:
Արցախի հրետակոծված շենքերի բնակիչները պատերազմի ավարտից հետո պետական փոխհատուցում կստանան