ԵՐԵՎԱՆ, 7 հոկտեմբերի – Sputnik. Հայաստանի ազգային հավաքականի և «Ռոմայի» կիսապաշտպան Հենրիխ Մխիթարյանը կոչով դիմել է ԵԱՀԿ Մինսկի խմբի համանախագահ երկրների առաջնորդներին` Ռուսաստանի Դաշնության նախագահ Վլադիմիր Պուտինին, Ֆրանսիայի նախագահ Էմանուել Մակրոնին ու ԱՄՆ նախագահ Դոնալդ Թրամփին։
«Ես պրոֆեսիոնալ մարզիկ եմ, ներկայացնում եմ Հայաստանը և այս նամակը գրում է ծանր սրտով: Քանի որ աշխարհը տեսնում է Արցախում տեղի ունեցող այս աննախադեպ և ողբերգական պատերազմը, թույլ տվեք իմ անհանգստությունն արտահայտել և ասել` Հայրենիքս գտնվում է իրական վտանգի առջև: Արդեն երկու շաբաթ է` ծանր մարտեր են ընթանում: Իմ հայրենի Արցախն ու Հայաստանը պաշտպանվում են ագրեսորի հարձակումներից»,– գրել է նա:
Մխիթարյանը նշել է, որ ադրբեջանական զինված ուժերը Ստեփանակերտում թիրախավորում են դպրոցներ, մանկապարտեզներ, հիվանդանոցներ և այլ քաղաքացիական ենթակառուցվածքներ: Հրթիռային զենքերն օգտագործվում են խաղաղ բնակչության դեմ ու հանգեցնում մեծաթիվ զոհերի ու վիրավորների:
«Սա պատերազմական հանցագործություն է: Ստեղծված իրավիճակը հանգեցրել է մարդասիրական աղետի: Եվ այս ողբերգության մեջ ուղղակի մասնակցություն ունեն տարածաշրջանում գործող արտաքին ուժերը: Օտար գրոհայինները մոտեցել են Ռուսաստանի և Եվրոպական միության սահմաններին, ինչն ուղիղ սպառնալիք է նաև ձեր երկրների անվտանգության համար: Հայաստանն ու Արցախը միայնակ են պայքարում են միջազգային ահաբեկչության դեմ:Հանդիսանալով Հայաստանի Հանրապետության պատմական դաշնակիցներ և ԵԱՀԿ Մինսկի խմբի համանախագահներ` դուք կարող եք միջամտել և Ադրբեջանին ստիպել կանգնեցնել այս կործանարար պատերազմը»,– ընդգծել է ֆուտբոլիստը:
Նա նշել է, որ երկրի զարգացմանը մասնակցելու փոխարեն մեր երիտասարդները զոհվում են առաջնագծում:
«Կոչ եմ անում օգտագործել ձեր բոլոր կարողությունները, դադարեցնել այս ողբերգությունն ու կողմերին վերադարձնել խաղաղ բանակցությունների սեղանի շուրջ»,– եզրափակել է Մխիթարյանը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 244 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 390 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ