ԵՐԵՎԱՆ, 8 հոկտեմբերի - Sputnik. ՀՀ վարչապետ Նիկոլ Փաշինյանի մարտակոչից հետո 48 ժամվա ընթացքում տասնյակ հազարավոր քաղաքացիներ զինվորագրվել են ու մարտի են նետվել։ Այս մասին այսօր կայացած ճեպխազրույցում հայտարարեց ՀՀ ՊՆ ներկայացուցիչ Արծրուն Հովհաննիսյանը։
«Եվ նրանց շնորհիվ են կոփվում մեր հաղթանակները»,– ասաց նա։
Հարցին, թե արդյոք Հայաստանն ունի՞ դաշնակիցներ, որոնք աջակցում են նրան Ադրբեջանի դեմ պայքարում, Հովհաննիսյանն ասաց. «Այո՛, մենք ունենք դաշնակիցներ, բայց մեր դաշնակիցները մարտադաշտում մեր կողքին չեն, որովհետև մենք դրա կարիքը չունենք; Մեր զինված ուժերը մարտերը վարում են ու հաղթանակները տանում են` հենվելով միայն մեր ժողովրդի բարձր մարտունակության ու մոբիլիզացիոն ցուցանիշների վրա»։
Արծրուն Հովհաննիսյանը հայտարարեց, որ Արցախի տարածքում ներկա պահին Հայաստանից կռվում են միայն կամավորներն ու պահեստազորայինները։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 7-ի ժամը 16։00-ի դրությամբ` հակառակորդի կրակոցների հետևանքով զոհվել են 324 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ