ԵՐԵՎԱՆ, 7 հոկտեմբերի – Sputnik. Արցախի վերաբերյալ Հայաստանի հետ բանակցություններ սկսելու համար Ադրբեջանի առաջ քաշած պայմանները հազիվ թե իրագործելի լինեն։ Եվրախորհրդարանի նստաշրջանում Արցախի վերաբերյալ լսումների ժամանակ այսպիսի հայտարարություն է արել ԵՄ արտաքին հարաբերությունների և անվտանգության հարցերով գերագույն ներկայացուցիչ Ժոզեպ Բորելը։
«Իրավիճակը տարածաշրջանում վատթարանում է։ Ադրբեջանի արտգործնախարարը հեռախոսազրույցի ժամանակ ինձ հայտնել է Արցախում հակամարտության դադարեցման իրենց պահանջները Հայաստանի նկատմամբ։ Խոսքը տարածաշրջանից հայկական զինվորականների դուրսբերման ժամանակացույցի տրամադրման մասին է, ինչը հազիվ թե իրագործելի է»,–ասել է Բորելը։
Բորելը նաև նախազգուշացրել է հակամարտության մեջ օտարերկրյա խաղացողների ներգրավման վտանգի մասին և հայտարարել, որ տարածաշրջանում բազմաթիվ կեղծ տեղեկություններ են տարածվում, որոնք ուղղված են հակամարտության մասնակիցների բնակչության համախմբմանն ու օտարերկրյա աջակցության ներգրավմանը։
Նա հորդորել է մեծ զգուշությամբ վերաբերվել հակամարտության գոտուց ստացվող տեղեկություններին, հատկապես ԵԱՀԿ մոնիթորինգային առաքելության աշխատանքների դադարեցման պայմաններում։ Բորելն իր խոսքում ուղիղ չի հիշատակել Թուրքիայի կողմից սիրիացի իսլամիստներին տարածաշրջան տեղափոխելու մասին տեղեկությունը, որն ավելի վաղ հաստատել էին նույնիսկ ԵՄ մի շարք երկրներ, այդ թվում` Ֆրանսիան։
Բորելը կրկին ընդգծել է մարտական գործողությունների անհապաղ դադարեցման և ԵԱՀԿ ՄԽ շրջանակում հակամարտության կարգավորմանն ուղղված ջանքերի վերականգնման վերաբերյալ ԵՄ–ի դիրքորոշումը։
ՄԻԵԴ–ը հաստատել է Թուրքիայի ներգրավման փաստը. որը կարող է լինել հաջորդ քայլը
Եվրախորհրդարանի նստաշրջանի ժամանակ ծավալված բանավեճի ընթացքում եվրոպացի պատգամավորներից շատերը կարծիք հայտնեցին, որ Թուրքիայի նախագահն արցախյան հակամարտությունն օգտագործում է Օսմանյան կայսրությունը մասամբ վերականգնելու, հարևան տարածաշրջաններում (լինի դա Սիրիա, Լիբիա, Արևելյան Միջերկրական ծով կամ Անդրկովկաս) Թուրքիայի ազդեցությունը տարածելու համար։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 284 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ