ԵՐԵՎԱՆ, 6 հոկտեմբերի - Sputnik. Վրաստանում Հայաստանի դեսպանությունը հերքում է տարածել` հայտնելով, որ համացանցում շրջանառվող տեղեկությունները, թե Վրաստանը խոչընդոտում է դեպի ՀՀ վառելիքի ներկրմանը ու հրաժարվում է բաց թողնել դեպի Հայաստան հումանիտար օգնությունը, չեն համապատասխանում իրականությանը։
Նշենք, որ լրատվամիջոցներում լուրեր էին շրջանառվում, թե Վրաստանը խոչընդոտներ է հարուցում Հայաստան ներկրվող կարևոր նշանակության բեռների հարցում։ Մասնավորապես, մի քանի օր է՝ վրացական նավահանգիստներից թույլ չեն տալիս վառելիքով բեռնված ցիստեռնների փոխադրումը Հայաստան։
«Ե՛վ վառելիքի, և՛ հումանիտար օգնության տեղափոխման հետ կապված որևէ խնդիր չկա։ Վրաստանում ՀՀ դեսպանությունը մշտական կապ է պահպանում Վրաստանի համապատասխան կառույցների հետ»,–նշված է դեսպանության տարածած հայտարարության մեջ։
Հայաստան-Վրաստան էլեկտրահաղորդման ցանցի շինարարությունը դարձյալ հետաձգվում է
Այնուամենայնիվ, Վրաստանի տարածքով տարանցման հետ կապված որևէ խնդրի առաջացման պարագայում, դեսպանությունը խնդրում է անմիջապես կապ հաստատել իրենց հետ՝ հարցին արագ լուծում տալու համար։
Միաժամանակ հորդորում են ապատեղեկատվություն չտարածել, քանզի այն ուղղակիորեն հարվածում է ՀՀ պետական շահերին։