ԵՐԵՎԱՆ, 6 հոկտեմբերի - Sputnik. ՀՀ ԱԺ–ն այսօր քննարկում է ՀՀ կառավարության առաջարկած «Պաշտպանության մասին ՀՀ օրենքում» փոփոխություններ կատարելու մասին նախագիծը։ Դրանով գործադիրն առաջարկում է փոփոխել հանրապետությունում հաստատված ու այժմ գործող զորահավաքային պլանը։
Ինչպես նախագծի ներկայացման ժամանակ հայտնեց ՀՀ պաշտպանության փոխնախարար Գաբրիել Բալայանը, փոփոխության անհրաժեշտությունը պայմանավորված է Արցախում ու Հայաստանի սահմաններում տիրող իրավիճակով։
«Ընդունված փոփոխությունը թույլ կտա հանրապետությունում հաստատել զորահավաքային նոր պլան, ինչը հատկապես արդիական է Ադրբեջանի և Թուրքիայի սանձազերծած ռազմական գործողությունների ու ՀՀ–ում հաստատված ռազմական դրության պայմաններում»,– ասաց Բալայանը։
Բանն այն է, որ 2015 թվականին ՀՀ Սահմանադրական փոփոխություններից հետո այս ընթացքում ի հայտ են եկել որոշ օրենսդրական բացեր։
Մասնավորապես` նախկին Սահմանադրությամբ զորահավաքային պլանները հաստատվում էին ՀՀ նախագահի հրամանագրերով, իսկ գործող Սահմանադրությամբ այս գործառույթը դուրս է նախագահին վերապահված լիազորությունների շրջանակից։
Առաջարկվող փոփոխությամբ զորահավաքային պլանի հաստատումը առաջարկվում է վերապահել ՀՀ կառավարությանը։
Օրենքը հաստատվելու է անհետաձգելի կարգով։ Առաջին ընթերցումից անմիջապես հետո այն քննարկվելու ու քվեարկվելու է նաև երկրորդ ընթերցմամբ։